தன்னைத் தானே பார்த்தல்
பூனையின் பிம்பம் புலியாகத் தெரியலாம்
புலியின் பிம்பம் கிலியைத் தருவதாகத் தெரியலாம்
சிங்கத்தின் பிம்பம் அசிங்கமாகத் தெரியலாம்
அசிங்கத்தின் ஜம்பம் சிங்கமாகக் கூடத்
தெரியலாம்
மனிதனின் அங்கம் அசல் குரங்காகத் தெரியலாம்
குரங்கின் பிம்பம் மனிதனாகக் கூடத்
தெரியலாம்
புறத்தின் கண்ணாடியில் முகம்
அழகாகத் தெரியலாம்
அகத்தின் கண்ணாடியில் அகம் அசிங்கமாகத் தெரியலாம்!
- தஞ்சை த இராமநாதன்
பாதுகாப்பென்பது யாதெனில்...
ஆட்களின் தவறால் ஆபத்து இல்லாது வேலை நடந்தால் அது பாதுகாப்பு
இடத்தால் காயமோ இறப்போ இல்லாது
வேலை நடந்தால் அதுவும் பாதுகாப்பு
சமதளத்தில் நடந்து தடுக்கி வழுக்கி விழாமல் நடந்தால் அது பாதுகாப்பு
பொருளோ ஆளோ கீழே விழாது வேலை செய்தால் அதுவும் பாதுகாப்பு
மேற்பார்வை தொடர்ந்து இருந்தால் அது நிர்வாகத் திறமையினால் பாதுகாப்பு
இடரைத் தடுக்க உயர்நிலை கட்டுப்பாடு இருந்தால் அதுவும் பாதுகாப்பு!
- தஞ்சை த இராமநாதன்
என் பெரியம்மா (இறப்பு: 29-08-2022)
அம்மா வீட்டில் பிறந்த பெரியம்மா
பாட்டன் வீட்டில் வாழ்ந்த பெரியம்மா
அம்மணியின் மூத்த மகள் பெரியம்மா
அய்யாவின் செல்ல மகள் பெரியம்மா
இரு தம்பிகளுக்குத் தெம்பு பெரியம்மா
இரு தங்கைகளுக்குப் பலம் பெரியம்மா
அக்காயியின் அம்மா என் பெரியம்மா
அண்ணய்யாவின் அம்மா என் பெரியம்மா
மாரியம்மாவின் அம்மா என் பெரியம்மா
பேரப் பிள்ளைகளுக்குப் பிடித்தவர் என் பெரியம்மா!
நகைச் சுவை பல அறிந்த பெரியம்மா
நகைகள் பல அணிந்த பெரியம்மா
இங்கிருந்து உறவுகளை இணைத்து வைத்து ஆசீர்வதித்தப் பெரியம்மா எங்கிருந்தாலும் எங்களை இணைத்து வைத்தே ஆசீர்வதியுங்கள் பெரியம்மா!
- தஞ்சை த இராமநாதன்
தீயது யாதெனில்...
எரிபொருள் ஆக்ஸிஜன் வெப்பமென முக்கோணத்தில் வந்தால் பிடிக்கும் தீ
இம்மூன்றும் எக்கோணத்தில் வந்தாலும் அக்கோணத்திலும் பிடிக்கும் தீ
மூன்றும் சேர்ந்தாலும் பொருளின் எரி வெப்ப நிலை வந்தால்தான் பிடிக்கும் தீ
எரியும்போது காற்றடித்தால் ஆக்ஸிஜன்
அதிகரிப்பால் பிடிக்கும் பெருந் தீ
முக்கோணப் பிணைப்பை உடைத்தால்
உடனே நின்றுவிடும் பிடித்தத் தீ
பிணைப்பை முன்கூட்டியே தடுத்தால் பிடிக்காது தடுக்கப்படும் தீ!
- தஞ்சை த இராமநாதன்
நேசிக்காமல் அன்னையாக முடியுமா?
பலரைப் பெற்றெடுத்து அன்னையானோர் பலபேர்
சிலரைக்கூட பெற்றெடுக்காது
அன்னையானோர் சிலபேர்
இவர்களெல்லாம் அன்னையாயென
பெயரெடுத்தோர் பலபேர்
இவர்கள்தான் அன்னையென பெயரெடுத்தோர் சிலபேர்
அன்னைகளுக்கு அன்னையானபின் பாட்டியாகி இறந்தோர் பலபேர்
அனாதைகளுக்கும் அன்னையாகி பாடமாகி இறந்தோர் சிலபேர்!
- தஞ்சை த இராமநாதன்
யார் மேதை? யார் பேதை?
பேதைகள் நிறைந்து விட்டதால் மேதைகள் குறைந்து விட்டனரா?
மேதைகள் குறைந்து விட்டதால்
பேதைகள் நிறைந்து விட்டனரா?
தெரியாததையும் புரியம்படி சொன்னால் அவர்தான் நாடறிந்த மேதையா?
தெரிந்ததையும் புரியாதபடி சொன்னால் அவர்தான் நாடறிந்த பேதையா?
முனைவர் பட்டத்தை வாங்க முடிந்த அனைவரும் படித்த மேதைகளா?
முனைவர் பட்டத்தை வாங்க முடியாத
அனைவரும் படிக்காத பேதைகளா?
- தஞ்சை த இராமநாதன்
பழுத்தாலும் பழமாகாத மிளகாய்
பச்சை மிளகாய்க் காரம் பத்து மிளகைச் சேர்த்தாலும் கிடைக்காதக் காரம்
பத்து மிளகில் கிடைக்கும் சாரம் பல மிளகாயையும் விரட்டிவிடும் தூரம்
பட்ட மிளகாயின் வீரம் தூளானாலும் தூளே தூள் கிளப்பிவிடும் பாரும்
பட்ட மிளகின் காரம் தூளாகித் தூவும் உணவின் சுவைதனில் பாரும்
மிளகாய்ப் பழுத்தாலும் மிளகாயெனவே பெயரெடுத்தக் கார மிளகாய்
மிளகுப் பழுத்ததாவெனப் பார்த்தாலும் மிளகு மிளகெனவே நிலைக்கும் மிளகாய்!
- தஞ்சை த இராமநாதன்
டமில்நாடு தலைநகரம் Chennai
சென்னையே உன்னையே மெட்ராஸ் என அழைத்தார்களே முன்னையே
சென்னையே உன்னையும் சேர்த்து ஆண்டவர் சோழர்தானே முன்னையே!
இடையில் அவன் ஆண்டான் இவன் ஆண்டானென ஆடாதே சென்னையே
ஆண்டவரே இல்லையென சொல்லி ஆண்டவன் பெயரேன் சென்னையே?
பல்லவ சேர பாண்டிய சோழ மன்னரின் மாநகரமாகி சிறப்புறு சென்னையே
டமில்நாடு Thamizhnatu என மாறி மாறாப் புகழைப் பெற வித்திடு சென்னையே!
மாறவே மாட்டேனென அடம் பிடித்தால் Sennaiயாக மாறிவிடு சென்னையே!
- தஞ்சை த இராமநாதன்
உப்பிட்டவரை உயிருள்ளவரை மறக்க முடியுமா?
பெருமளவில் பிரியாணி சமைத்து சிறிதளவு உப்போடு உண்டதை மறக்க முடியுமா?
பெருமளவில் பிரியாணியை பந்தியில் உப்புக் கரிக்க உண்டதை மறக்கத்தான் முடியுமா?
அளவோடு உப்பிட்டு அலாதி சுவையில்
சாப்பிட்ட பழங்காலப் பண்டத்தை மறக்க முடியுமா?
அளவில்லா உப்போடு துப்பிட வைக்கும்
இக்காலப் பண்டத்தை மறக்கத்தான் முடியுமா?
அளவோடு உப்பிட்டவரை மறந்தாலும் அளவில்லாது உப்பிட்டவரை மறக்கத்தான் முடியுமா?
- தஞ்சை த இராமநாதன்
கடலில் சுதந்திரமா? கடலுக்கு சுதந்திரமா?
தரையின் எல்லையாக வேலியாலே எல்லையை அமைத்துப் பிரித்தோம்
வான் எல்லையாக தரையிலேயே எல்லையைப் பிரித்து அமைத்தோம்
கடலின் எல்லையாக அலையிலே
எல்லையைப் பிரித்து மிதந்தோம்
தரையைப் பிரித்ததாலே தரை தாண்டி
சென்று சேர்வதைத் தடுத்தோம்
காற்றைத் தடுத்து எல்லையைத் தாண்டாது
தடுக்க முயன்றாலும் தோற்போம்
எல்லையைத் தாண்டும் மீனவரைத் தடுத்து
மீனைத் தடுக்க முடியாது திகைப்போம்!
- தஞ்சை த இராமநாதன்
காலத்தை வென்றார் உண்டோ?
ஒவ்வொரு நொடியும் நேரம் ஓடிக் கொண்டே இருக்குது ஒவ்வொரு நொடியும் வயதும் கூடிக் கொண்டே இருக்குது
பன்னிரெண்டுக்குப் பிறகு நேரம் குறைந்தும் கூடியும் சுத்துது
பன்னிரெண்டு வயதுக்குப் பிறகும் பதின்ம பருவத்தைத் தாண்டிக் கூடுது
நேரம் போகுது என்றாலும் கடிகாரம் தளராது சுற்றி சுற்றித் தொடருது
வயது ஆகுது என்றதும் உடல் தளர்ந்து முடி நரைத்து தோலும் சுருங்குது!
- தஞ்சை த.இராமநாதன்
ஆதாயமின்றி ஆட்டை மேய்ப்பவர் இல்லை
ஆதாயம் இல்லாமல் ஆட்டைக் கட்டிப் காப்பவரும் உலகத்தில் இல்லை
ஆதாயம் இல்லாமல் ஆட்டை ஓட்டி மேய்ப்பவரும் உலகத்தில் இல்லை
ஆட்டை வெட்டும்போது கட்டிக் காத்ததை
நினைப்பவரும் உலகத்தில் இல்லை
சாப்பாட்டை வெட்டும்போது மேய்த்ததை
நினைப்பவரும் உலகத்தில் இல்லை
கொன்ற பாவம் தின்றால் போகுமென
பேசாதவர் உலகத்தில் இல்லை
தின்ற பாவம் கொன்றால் போகுமென பேசுபவரும் உலகத்தில் இல்லை!
- தஞ்சை த இராமநாதன்
அரிய அவதாரம் ராம்சந்திரர் (பாபுஜி)
மனிதராய்ப் பிறந்து இறந்து மறைந்து மறந்த அவதாரங்கள் உண்டு
மனிதராய்ப் பிறந்து இறந்து மனதினில் நிறைந்த அவதாரங்களும் உண்டு!
பதஞ்சலிபோல் வாழ்ந்தவர் ராம்சந்திரர் ராமரைப்போல் ஒளிர்ந்தச் சந்திரன் ராம்சந்திரர்
பஞ்சுபோன்ற மனதுடன் கிருஷ்ணராய்
ஒளிர்ந்தச் சூரியன் ராம்சந்திரர்
சகஜமார்க்க முறையில் ராஜயோகாவை
சுலபமாக்கிய வெற்றியாளர் ராம்சந்திரர்
சுய உணர்தல் முறையில் தியானத்தை சக மனிதர் யாவருக்கும் தந்தவர் ராம்சந்திரர்!
- தஞ்சை த.இராமநாதன்
நீதியும் நீதி மன்றத் தீர்ப்பும்
அதிகாரத்தை வைத்து கூறப்படுவது இல்லை தீர்ப்பு
ஆதாரத்தை வைத்து கூறப்படுவதுதான்
நீதிமன்றத் தீர்ப்பு
சட்டத்தை மட்டும் வைத்து கூறப்படுவது இல்லை தீர்ப்பு
மற்றதை வைத்தும் கூறப்படுவதுதான்
நீதிமன்றத் தீர்ப்பு
நியாயத்தை வைத்து கூறப்படுவது
இல்லை தீர்ப்பு
விவாதத்தை வைத்து கூறப்படுவதுதான்
நீதிமன்றத் தீர்ப்பு!
- தஞ்சை த இராமநாதன்
கை கொடுத்ததும் பை கொடுப்பதும்
விழாவிற்கு வந்தோரை வரவேற்று கை கொடுத்தது பழமையாச்சு
வந்து செல்வோரை கட்டிப் பிடித்து வழி அனுப்பியதும் பழமையாச்சு
விழாவிற்கு வருவோரும் பையைத் தேடி வருவது புதுமையாச்சு
வந்து செல்வோருக்கு பையை ஓடிக் கொடுப்பதும் புதுமையாச்சு
கையைக் கொடுத்தாலும் காலை வாரி விட்டோர் சிலர் அது பழமையாச்சு
பையைக் கொடுத்தாலும் காலை வாரி
விடுவோர் பலர் இது புதுமையாச்சு!
- தஞ்சை த இராமநாதன்
போதைப் பழக்கமும் புழக்கமும்
போதைப் பொருட்களின் புழக்கம் அதிகமானதால் பழக்கம் அதிகமானதா?
போதைப் புழங்கிகளின் பழக்கம் அதிகமானதால் புழக்கம் அதிமானதா?
புழக்கம் அதிகமெனில் சட்டம் அதன் கடமையைச் செய்ய முடியவில்லையா?
பழக்கம் அதிகமெனில் பெற்றோர் தன்
கடமையைச் செய்ய முடியவில்லையா?
அறிவு கெட்டப் பழக்கமென தெரிந்தே அதைச் செய்வோரை அடக்க முடியாதா?
அழிவு கட்டாயம் கிட்டுமென தெரிந்தே
அதைச் செய்வோரை ஒடுக்க முடியாதா?
- தஞ்சை த இராமநாதன்
அன்பின் அன்னை இல்லம்
ஆன்மிகக் குருமார்கள் ஆசியால் கட்டப்பட்டது இந்த இல்லம்
மைத்துனர் திருநாவுக்கரசு முன்னின்று கட்டி முடிக்கப்பட்டது இந்த இல்லம்
இருபான் ஈரொன்று வருடம் முன்பே
ஒளியூட்டப்பட்டது இந்த இல்லம்
ஈராயிரம் இருபான் இரண்டாம் வருடம் ஒளிக் கூட்டப்பட்டது இந்த இல்லம்
தஞ்சை ராஜ்யத்தில் அழகுடன் அமைந்த அமைதியான இல்லம்
தஞ்சை ராமராஜாக்களின் அன்பு கலந்த அன்னை ஞானம் இல்லம்!
- தஞ்சை த இராமநாதன்
சைவமான யானை
பசித்தாலும் தின்னப் பிடிக்காததை
நின்றுத் தின்னாது யானை
ருசித்தாலும் தின்னப் பிடித்ததை தின்றுத் தீர்க்காது யானை
உண்ட மரத்தை அடியோடு ஒடித்து அழிக்காது யானை
கண்ட மரத்தை கண்டபடிக் கடித்து உண்ணாது யானை
தடியால் அடித்த அடியை என்றுமே மறக்காது யானை
அடியாள் அடித்தத் தடியை என்றுமே மறக்காது யானை
அசிங்கமாய் கொன்றுத் தின்று அசைவமாய் வாழாது யானை
சிங்காரமாய் மென்றுத் தின்று
சைவமாய் வாழுது யானை!
- தஞ்சை த இராமநாதன்
சாலையும் பூஞ்சோலையும்
தரத்தோடு உருவாக்கப்பட்ட சாலை
மரத்தோடு வடிவமைக்கப்பட்ட சோலை
கருமையான புத்தம் புதிய சாலை
அருமையான சுத்தம் உடைய சோலை நல்ல தரத்தோடு தாராலான சாலை நல்ல தாவரத்தோடு தயாரான சோலை
பந்தாவோடு ஆரம்பமானது இவ்வேலை
பராமரிப்போடு தொடருமா இவ்வேலை?
- தஞ்சை த இராமநாதன்
தியாகம்
யாகம் செய்ய நெருப்பில் நெய் தேவை
தியாகம் செய்ய இருப்பில் மெய் தேவை
யாகம் தொடர தொடர் நெருப்பு தேவை
தியாகம் தொடர தொடர் விருப்பு தேவை
யோகம் செய்ய புறத் தூய்மை தேவை
தியாகம் செய்ய அகத் தூய்மை தேவை
மோசம் செய்ய அடாவடி தேவை
தியாகம் செய்ய விடாபிடி தேவை
மோசம் செய்வோருக்கு பணம் தேவை
தியாகம் செய்வோருக்கு மனம் தேவை
துரோகம் செய்து ஏமாற்ற நடிப்பு தேவை
தியாகம் செய்து காப்பாற்ற துடிப்பு தேவை
துரோகம் செய்வோருக்கு கல் நெஞ்சம் தேவை
தியாகம் செய்வோருக்கு நல் நெஞ்சம் தேவை
துரோகச் செயல் குறைந்திடல் உடனடித் தேவை
தியாகச் செயல் நிறைந்திடல் உடனடித் தேவை
துரோகம் செய்வோரை இகழ்ந்துத் தூற்றுவோர் தேவை
தியாகம் செய்வோரை புகழ்ந்துப் போற்றுவோர் தேவை!
- தஞ்சை த இராமநாதன்
இறைவனுக்கு நன்றி
உண்ண முழுமையான உணவில்லை
என்றாலும்
அனைத்து உயிரையும் வாழ வைக்கும் இறைவனுக்கு நன்றி!
வாயோடு மூக்கையும் சேர்த்து மூட வைத்தாலும்
திறந்துண்டு சுவாசிக்க அனுமதித்த
இறைவனுக்கு நன்றி!
வெள்ளப் பெருக்கெடுத்து கரை தாண்டித்
தாக்கினாலும்
வெயிலின் தாக்கத்தைக் குறைத்த இறைவனுக்கு நன்றி!
- தஞ்சை த இராமநாதன்
சட்டத்தின் ஆளுமையால் வளர்ந்த நாடு
குடிநீருக்கு ஊற்றற்ற ஊர் சிங்கப்பூர்
குடிநீருக்கு குறைவற்ற ஊர் சிங்கப்பூர்
விளை நிலம் குறைந்த ஊர் சிங்கப்பூர்
விலை நிலம் நிறைந்த ஊர் சிங்கப்பூர்
அடுக்குமாடிகள் நிறைந்த ஊர் சிங்கப்பூர்
கிடுக்குப்பிடிகள் நிறைந்த ஊர் சிங்கப்பூர்
உலகச் சந்தையை அமைத்த ஊர் சிங்ஙப்பூர்
உலகை வியப்படைய வைத்த ஊர் சிங்கப்பூர்
கடல் வளத்திற்கு உகந்த ஊர் சிங்கப்பூர் உடல் நலத்திற்கு தகுந்த ஊர் சிங்கப்பூர் சத்தம் அதிகம் இல்லாத ஊர் சிங்கப்பூர் சுத்தம் அதிகம் இருக்கும் ஊர் சிங்கப்பூர் பரப்பளவில் சிறிய ஊர் சிங்கப்பூர் பணத்தளவில் பெரிய ஊர் சிங்கப்பூர்!
- தஞ்சை த இராமநாதன்
உத்திரப்பிரதேசத்தில் உதித்தவர் இவர்
எத்தேசத்திலும் நிலைத்தவர் இவர்
ராஜயோகாவில் ராஜாதி ராஜர் இவர்
ராஜபோக வாழ்க்கை வம்சத்தவர் இவர்
பதஞ்சலிப் பாதையில் நடந்தவர் இவர்
பாதையை குறுகத் தறித்தவர் இவர்
ஹத யோகாவை தவிர்த்தவர் இவர்
மத மோகாவை வெறுத்தவர் இவர்
பிரணாஹுதி கண்டெடுத்தவர் இவர்
மரணபீதி வென்றெடுத்தவர் இவர்
மூன்றுடல் அடங்கிய ஓருடல் என்றவர் இவர்
மூன்றானது சத் ராஜ் தம் என்றவர் இவர்
லெளகீகத்தை துறக்காதவர் இவர்
ஆன்மிகத்தை மறக்காதவர் இவர்!
- தஞ்சை த இராமநாதன்
இட்லியில் இருக்கு சத்து
முழு உளுந்தை ஊற வைத்து கருப்புத் தோலை மிதக்க வைத்து
மிதப்பதைக் கையால் நீக்க வைத்து
மீண்டும் நீரைக் கலக்க வைத்து
வடித்துத் தோலை நீக்க வைத்து
வெள்ளை உளுந்தை ஒதுக்கி வைத்து
அரிசியைத் தனியாக ஊற வைத்து அழுக்கு நீரை வடிய வைத்து
ஆட்டுக் கல்லில் ஆட்ட வைத்து
தனிப் பாத்திரத்தில் எடுத்து வைத்து
உளுந்து மாவைக் கலக்க வைத்து
நொதியால் மாவைப் புளிக்க வைத்து
துணியின் துணையோடு வேக வைத்து
உடனே உண்ண வேண்டும் சுவைத்து!
- தஞ்சை த இராமநாதன்
வெகுண்டு எழுந்ததோ காவிரி?
ஆற்றிலே ஆர்த்தெழும் காவிரியே ஆடியிலேயே ஆடி கடலைத் தேடி ஓடி கலந்துவிடத்தான் இந்த ஓட்டமா?
படிக்காதோர் படித்தார் போன்றும் படித்தார் படிக்காதோர் போன்றும் ஆனதைக் கண்டிக்கவே இந்த ஓட்டமா?
இல்லாதோர் இருப்போரைப் போன்றும் இருப்போர் இல்லாதோரைப் போன்றும் ஆனதைத் தண்டிக்கவே இந்த ஓட்டமா?
குறிஞ்சியில் நீரோட்டம் பின் முல்லை மருதத்தில் வெள்ளோட்டம் அதன் பின் நெய்தலில் நிலையான அலை ஆட்டமா?
- தஞ்சை த இராமநாதன்
நம்பிக்கை
கடன் வாங்கினால் கடனைக் கொடுத்து விடலாம் என்பது ஒரு சாரார் நம்பிக்கை
கடன் கொடுத்தால் கடனை வாங்கி விடலாம் என்பது மறு சாரார் நம்பிக்கை
கடவுள் துன்பத்தைத் தரவே மாட்டாரென நினைப்பது ஒரு சாரார் நம்பிக்கை
துன்பம் வந்தாலும் நீக்குவார் கடவுள் என நினைப்பது மறு சாரார் நம்பிக்கை
தேர்தலில் வெற்றிப் பெறலாம் என நினைப்பது அரசியல்வாதி நம்பிக்கை
தேர்தலுக்குத் தேர்தல் பணம் கிடைக்கும் என நினைப்பது வாக்காளர் நம்பிக்கை
தன் பிள்ளைகள் நற்பெயரை எடுப்பர் என்பது பெற்றோரின் நம்பிக்கை
நற்பெயரை எடுக்க முடியுமாவென பிள்ளைகள் நினைப்பது அவநம்பிக்கை
இப்படித்தான் சம்பாதிக்க வேண்டுமென நினைப்பது தரமான நம்பிக்கை
எப்படியும் சம்பாதித்து விடாலாமென நினைப்பது தரங்கெட்ட நம்பிக்கை
எந்த நிலை வந்தாலும் யானைக்குப் பலமாக இருப்பது அதன் தும்பிக்கை
மந்த நிலை வந்தாலும் மனிதனுக்குப் பலமாக இருப்பது தன் நம்பிக்கை!
- தஞ்சை த இராமநாதன்
முடிந்த போதும் முடியாத போதும்
முடிந்தபோது முடியாததைப் பற்றி நினைக்க முயன்றதுமில்லை
முடியாதபோது முடிந்ததைப் பற்றி நினைக்க முடிவதுமில்லை
முடிந்தபோது முடிந்த உதவியை செய்யாமல் இருந்ததுமில்லை
முடியாதபோது முடிந்தவர்கள் உதவியை நாடி இருந்ததுமில்லை
முடிந்த கால உதவிகளைப் பெற்றோர் முழுதாகப் போற்றுவதுமில்லை
முடியாத கால உதவிகளைப் பெற்றோர் முழுதாகப் பெறப் போவதுமில்லை!
- தஞ்சை த இராமநாதன்
கல்லாகிப் போனதோ முதுகு?
முதுகு கல்லானதால் கல்லும் முதுகானது
முதுகு வளைவானதால் கல்லும் வளைவானது
வாழ்க்கை சோகமானதால் சுமை சுகமானது
சுமை கனமானதால் சோகம் மிதமானது
தொழிலே வலியானதால் வலியே தொழிலானது
ஏழ்மை நிலையானதால் நிலைமை
ஏழ்மையானது!
- தஞ்சை த இராமநாதன்
பயிற்சியோடுக் கூடிய முயற்சி
மலை ஏறுவது சளைப்பாக இருந்தாலும்
மலை ஏறுபவர் சளைப்படைவதில்லை
மலை ஏறுவது களைப்பாக இருந்தாலும்
மலை ஏறுபவர் களைப்படைவதில்லை
பயிற்சிப் பெற்றவர் மலை ஏறினாலும் முயற்சி இல்லாமல் ஏற முடிவதில்லை
பயிற்சிப் பெறாதவர் முயற்சித்தாலும் முயற்சி உடனே கைகூடி வருவதில்லை
புகழ்ச்சிக்காக மலையேறச் சென்றாலும்
முயற்சிக்கு இகழ்ச்சி வருவதில்லை!
- தஞ்சை த இராமநாதன்
