தீபாவளி வாழ்த்துகள்

 

தீபாவளி வாழ்த்துகள்

உலகெங்கும் வாழும் அதிக மக்களுக்கு
தெரிந்தது இந்தியர்களின் தீபாவளி
உலகத் தலைவர்கள் இந்தியர்களை அதிகம் வாழ்த்துவதும் இந்த தீபாவளி

சிறுவர்கள் முதல் பெரியவர்கள் வரை அதிகமாகக் கொண்டாடுவது தீபாவளி
ஏழைகள் முதல் பணக்காரர்கள் வரை அதிகமாகக் கொண்டாடுவதும் தீபாவளி

அயல் நாடுகள் அரசு விடுமுறை அதிகம் இந்தியர்களுக்குத் தருவது தீபாவளி
அற்புத நாடு சிங்கப்பூர் அரசு விடுமுறை எங்களுக்குத் தருவதும் தீபாவளி

புரியாதவர்கள் தீபாவளியைப் புகழாது விட்டாலும் இகழ்வது கூடவே கூடாது
புரிந்தவர்கள் தீபாவளியைப் புகழ்ந்து இருளை அகற்றுவதை விடவே கூடாது!

- தஞ்சை த.இராமநாதன்

சொந்தங்கள் நினைவோடு தீபாவளி

 

சொந்தங்கள் நினைவோடு தீபாவளி

நல்ல உயரமாக வளர்ந்த அத்தை
லஷ்மி அத்தையெனும் பெரிய அத்தை
லஷ்மணன் மாமாவை மணந்த அத்தை
உறவின் உணர்வை மதித்த அத்தை

சரிசமமாக அமர்ந்து ஆடு புலி ஆட்டம்          ராமு பெரியப்பாவோடு ஆடிய ஆட்டம்
புளிய மரத்தடியில் சீட்டு ஆட்டம் அது நாராயணன் மாமா அண்ணாமலைப் பெரியப்பா ஆகியோர் ஆடிய ஆட்டம்

போண்டா வாங்கித் தந்து அன்போடு அரவணைப்பார் சாயா தாத்தா
மீன் பரியும் பறவைக் கண்ணியும் செய்திடுவார் அடைக்கலம் தாத்தா
சிரித்துப் பேசி நாட்டுத் துப்பாக்கியோடு கலக்கிடுவார் குப்புசாமி தாத்தா
கொண்ட கடலையை தாராளமாக          அள்ளிக் கொடுப்பார் தம்பி தாத்தா

உன்னைப் போல் பிள்ளையைப் பெறக் கொடுத்து வைக்க வேண்டும் என்பார்
நல்ல பீடு நடையோடு bike ஓட்டுவார்      பாசமிகு ராவண்ணா பெரியப்பா    படிப்பதைப் பாராட்டி சுய உழைப்பின் கொள்கையோடு வாழ்ந்தார் குழந்தை பெரியப்பா

அன்று மறைந்தவர்கள் எல்லாம் இந்த தீபாவளிக்கு என் மனதினுள் வந்து    நனைத்த நல்லவர்களில் சிலர்
என்றோ மறைந்தவர்களில் எந்தன்        மனதில் நிலைத்தவர்களோ இன்னும் பலர்!

- தஞ்சை த.இராமநாதன்

அந்த நாள் தீபாவளி

 

விடியற்காலையில் தூக்கம் கலைந்து அலுப்போடு எழுந்து

எண்ணெயை உச்சந்தலையில் கையால் சூடேறத் தேய்த்து 

அடுப்பின் அனலில் காய்ந்த வெந்நீரை மெதுவாக மொண்டு 

வெந்நீர் ஊற்றுமுன் அரப்பை பக்குவமாகத் தலையில் தேய்த்து 

தலையில் சுடுநீரை ஊற்றி அரப்புச் சுவையை சுவைத்து

அரப்பு கண்ணில் பட்டு வழியும் கண்ணீரைப் புதுத் துண்டால் துடைத்து

பொத்தானைக் கழற்றி மணம் வீசும் புது உடையை உடுத்தி,

ஆனந்தமாய் உலா வந்த நாளே அந்த நாள்!

- தஞ்சை த.இராமநாதன்

அப்பாடியின் தீபாவளி (4...)

 

அப்பாடியின் தீபாவளி (4...)

காசாங்குளக்கரையின் களம் அது தீபாவளியின் வெடிக் களம் அது
வெடிக்கு வெடி இடைவெளி ஐந்தடி      வெடித்த காகிதம் பரவும் காணும்படி
நன்றாகக் காய வைத்த லஷ்மி வெடி
காகிதம் பறக்கும் வெடித்து சிதறியபடி
குறைந்தது 144 வெடியை வெடிக்க போவோரெல்லாம் பார்ப்பர் வெறிக்க
சளைக்காமல் வெடியை ஊன்றியபடி          முன் செல்வார் அண்ணன் சண்முகம் 
களைக்காமல் வெடியைக் கொளுத்தியபடி
பெருமிதம் அடைவான் அப்பாடி!

- தஞ்சை த.இராமநாதன்

அப்பாடியின் தீபாவளி (3...)

 

அப்பாடியின் தீபாவளி (3...)

தினந்தோறும் கொஞ்சம் கண்டிப்போடு இருப்பார் எங்கள் தையல் அம்மாயி
தீபாவளியன்று நிறைய இனிப்போடு இருப்பார் எங்கள் தையல் அம்மாயி

உயரமான உருவத்தோடு இருந்து
இனிமையான உள்ளத்தோடு இருந்தவர்
தீபாவளியன்று அமைதியோடு இருந்து
இன்று நீங்கா நினைவில் இருப்பவர் வைத்திலிங்கம் எனும் மாணிக்கம் தாத்தா

நடப்பது ஓடுவதைப் போல் இருந்தால்
பேசுவது பாடுவதைப் போல் இருக்கும்
தீபாவளியன்று ஒளியும் ஒலியும் சேர்ந்து  மத்தாப்பு சிரிப்பதைப் போல் கேட்கும்
பூரிப்பு புன்னகை ஒன்றாகச் சேர்ந்து மாணிக்கம் அம்மாயி இருக்குமிடம்    சிரிப்பின் சிறப்போடு வெடிக்கும்

அங்கே ஆர்வத்தோடும் துடிப்போடும் வெடியை வெடிப்பான் அப்பாடி!

- தஞ்சை த.இராமநாதன்

அப்படிதான் இருந்தது தீபாவளி

 

விளக்கமாறு சீவால் வெடியில் சொருகி
விலகி நின்று விளக்கில் பற்ற வைத்து
சிறு சீனி வெடியை வெடிக்கக் கற்றுக் கொடுப்பார் அப்பப்பா பிச்சைக்கண்ணு

எத்தனைப் பேர் எதனைப் பேசினாலும்        தன் கடமையைத் தவறாது செய்து        மறவாது பலகாரத்தைக் கொடுப்பார் எதார்த்தமான சின்னம்மா தீர்த்தம்மாள்

ஆடும் பல்லால் அவதி அடைந்து அதைப் பிடுங்கச் சொல்வார் அய்யாவு தாத்தா
பழுதான பல்லைப் பக்குமாய்ப் பிடுங்கி பலகாரம் சாப்பிட வைப்பேன் நான்

தீபாவளி வேளையில் வேலை செய்ய அனைவரும் அவசரத்தில் இருப்பர் அமைதியாய் அமர்ந்து நடப்பதைப்      பார்ப்பார் ஆயிப்பிள்ளை அம்மாயி!

- தஞ்சை த.இராமநாதன் 

அப்படி இருந்த தீபாவளி

 

புது உடைக்காகத் தினந்தோறும் கடையை நோக்கிக் காத்துக் கிடக்கும் மனம்
கடையிலிருந்து வீட்டுக்கு வந்து கையை அடைந்ததும் குதித்து ஆடிடும் தினம்

அப்பாயி கையில் பிடிபட்டுக் கட்டியாகி  உடைக்க முடியாத கெட்டி உருண்டை
எப்படியும் பல்லில் பிடிபடாது கெட்டியாகிக் கடிக்க முடியாத கெட்டி உருண்டை

மோரில் கலந்து இருந்த வெண்ணெய் அப்பாயி கடைந்து வந்த வெண்ணெய் மோரில் ஒளிந்து இருந்த  வெண்ணெய்
அப்படியே நெஞ்சில் சேர்ந்தது என்னை

அப்பா வாங்கிக் கொடுப்பார் சர வெடி
அப்படி ஓடோடி வெடிப்பேன் தர வெடி களத்தில் வைத்து வெடித்தேன் வெடி களத்தில் வைத்து வெடிப்பேன் வெடி!

- தஞ்சை த.இராமநாதன்

வாழையடி வாழைத் தத்துவம்

 

வாழையடி வாழைத் தத்துவம்

வாழை மரத்தைக் குலையோடு கொலை செய்வதைப்போல் ஓங்கி வெட்டி எடுத்து தலைக்குத் தலை குறுக்கீட்டைப்போல் வாழைப் பூவைக் குறுக்கிட வைத்து      நுழைவு வாயிலில் வாடி வதங்கும்வரை பந்தலோடு பரிதாபமாய் நிற்க வைத்து
வாழ்த்த வந்தோர் யாவும் வாழையடி வாழையாய் வாழ்கவென வாழ்த்துவர்!

- தஞ்சை த.இராமநாதன்

என்ன உலகமிது?

 

என்ன உலகமிது?

சொன்னதையே சொல்லிச் சொல்லிச் சொல்லும் சொல்லும்  கொல்லும்
சொல்லியதையே சொல்லச் சொல்லச் சொல்பவர்ச் செயலும் கொல்லும்

பொல்லாதவர் சொல்லும் சொல்லில்
இல்லாததைச் சிரித்துச் சொல்லும்
இல்லாதவர் சொல்லும் சொல்லில்
இருப்பதை திரித்துச் சொல்லும்

கடவுள் இல்லையெனக் கத்தியாகப் பாயும் சொல்லும் ஆழம் செல்லும்
கடவுள் இருப்பதாகப் பக்தியாகப் பாடும் சொல்லும் ஆழம் செல்லும்!

- தஞ்சை த.இராமநாதன் 

காந்தி ஜெயந்தி (காந்தியின் குரல்)

 

காந்தி ஜெயந்தி (காந்தியின் குரல்)

வாங்கி வைத்துக் குடித்திடக் கூடிடும் முதல் நாளிலேயே ஒரு கூட்டம்
வாங்கி வைத்தது முடிந்ததும் வாங்கிடக் கூடிடும் அடுத்த நாளில் ஒரு கூட்டம்                     
குடிக்கக் கூடாதெனக் கூட்டாகக் கூடிப் பேசக் கூடிடும் இந்நாளில் ஒரு கூட்டம்
கூடிப் பேசியபின் கூட்டாகக் குடிக்கக் கூட்டத்திலேயே திட்டமிடும் ஒரு கூட்டம்

குடிக்கக் கூடாதென உரக்கப் பேச குடிக்கக் கொடுத்துக் கூட்டிவரும் ஒரு கூட்டம்
குடித்தால் குடி கெட்டுவிடுமெனப் பேசியே
குடியைக் கெடுத்துவிடும் ஒரு கூட்டம்

எல்லா நாளிலும் புலாலோடு குடித்துக் கூத்தாடுது இந்த உருப்படாத கூட்டம்
எனதுப் பிறந்தநாளிலும் குடித்துக் கூத்தாடினால் உருப்படுமா இந்த கூட்டம்?

- தஞ்சை த.இராமநாதன்