புரியுதா? புரியவில்லையா?
புரிந்தவர் புரிந்தவரைப் புரிந்ததைப் புரியாதவருக்குப் புரியும்வரை புரிய வைத்தாலும் புரிந்தவருக்குப் புரிந்தது புரியாதவருக்குப் புரியுமா?
புரியாதவரிடம் புரிந்தவர் புரியும்வரை
புரியும்படி புரிந்தவற்றை புரிந்தவாறே புரிய வைத்தாலும் புரியாதவருக்கு புரிந்தவரைப்போல் புரியுமா?
புரிந்ததால் புரிந்ததைப் புரியுமாறு
புரியாதவருக்குப் புரிய வைத்தாலும் புரியாதவர் புரியும்வரை புரியாதது புதிராகத்தான் புரியும்!
- தஞ்சை த இராமநாதன்
கள்ளக்குறிச்சியில் கள்ளக்குடி
கள்ளக்குறிச்சியில் கள்ளச்சாராயத்தை மறைந்து குடித்து மறைந்தார்களே
நல்லக்குறிச்சியில் கள்ளச்சாராயத்தை மறந்து குடிக்காமல் இருப்பார்களா?
குடிக்கக்கூடாதெனத் தெய்வப் புலவர் திருவள்ளுவர் சொல்லி இருக்கிறாரே
குடித்துவிட்டே திருக்குறளை உளறித் தள்ளாத தமிழர்கள் இருக்கிறார்களா?
குடித்தே குடியைக் கெடுத்தவர்கள்
துடி துடித்தே இறந்தார்களே இனி
குடியால் குடியைக் கெடுப்போர்கள் குடியைக் குடிக்காமல் இருப்பார்களா?
குடி குடியைக் கெடுக்குமெனத் தெரிந்தே
குடித்துத் துவண்டு மாண்டார்களே இனி
குடி குடியைக் கெடுத்ததுப் போதுமென குடித்துக் கெடுவதைத் தடுப்பார்களா?
- தஞ்சை த இராமநாதன்
அவ்வாறு இவரும் இவ்வாறு அவரும்
இரக்கப்பட்டதால் இறக்கப்படுவோரும் இருக்கிறார்
இறக்கப்பட்டதால் இரக்கப்படுவோரும்
இருக்கிறார்
மறுக்கப்பட்டதால் மறைக்கப்படுவோரும் இருக்கிறார்
மறைக்கப்பட்டதால் மறுக்கப்படுவோரும் இருக்கிறார்
முடக்கப்பட்டதால் முடங்கிப்போவோரும் இருக்கிறார்
முடங்குவோரால் முடக்கப்படுவோரும்
இருக்கிறார்
அடக்கப்பட்டதால் அடங்கிப்போவோரும் இருக்கிறார்
அடங்குவோரால் அடக்கப்படுவோரும் இருக்கிறார்
கட்டுப்பட்டதால் கட்டுப்படுவோரும் இருக்கிறார்
கட்டுப்படுவோரால் கட்டுப்பட்டோரும் இருக்கிறார்
தட்டுப்பாட்டால் தட்டுத்தடுமாறுவோரும் இருக்கிறார்
தடுமாறுவோரால் தடம்மாறுவோரும் இருக்கிறார்!
- தஞ்சை த இராமநாதன்
படாதபாடு படுவோர்
படாதபாடு பட்டுப் பட்ட பாட்டால் பலன் அடைந்த பலபேர் அடைந்த பலனை அறவே மறக்கின்றார்
படாதபாடு பட்டு பயனை அடையாத சிலபேர் அடைய வேண்டிய பயனை அறவே துறக்கின்றார்
பாடாதி வாழ்வை வாழ்ந்தாலும்
பந்தா செய்து பகல் வேடமிட்டு பலபேர் பண்பற்று மானங்கெட்டு வாழ்கின்றார்
பண்பான வாழ்வால் வீழ்ந்தாலும்
மனதில் பட்டதைப் பேசிவிட்டு சிலபேர்
பணமற்று மானத்தோடு வாழ்கின்றார்!
- தஞ்சை த இராமநாதன்
மிதி வண்டி புகட்டும் பாடம்
மிதித்தால்தான் ஓட்ட முடியும் என்பதால் திமிரோடு மிதிப்பதும் உண்டு
மிதி பட்டால்தான் ஓட முடியும் என்பதால் சாலைதோறும் மிதி படுவதும் உண்டு
மிதித்தவன் மிதித்துக் கொண்டே இருக்கப் போவதும் இல்லை
மிதி பட்டவன் மிதி பட்டுக்கொண்டே இறக்கப் போவதும் இல்லை
மிதிக்க மிதிக்க ஓடும் ஓட்டம் கூடி வேகமும் அதிகரிக்கின்றது
ஓட ஓட மிதிப்பவர் மிதி வேகமும் கூடி ஓட்டமும் அதிகரிக்கின்றது
மிதித்தாலும் மிதிப்போரை மிதிக்குமாறு மதிக்கும் மிதிவண்டியை மதிப்போம்!
- தஞ்சை த இராமநாதன்
வதங்கினால் வாடி விடுவேன்
கூறு கெட்ட மக்களிடம் நான் கூறு கட்டி காய்களை விற்க வந்தேன்
மாடி வீட்டு மக்களிடம் கூரை வீட்டுக் காய்களை விற்க வந்தேன்
விற்று விட்டால் வியர்த்துக் கொட்டும் வியர்வையை வெறுக்க மாட்டேன்
விற்காவிடில் பொறுக்காது கொல்லும்
பசியையோ பொறுக்க மாட்டேன்
தள்ளாத வயதில் காலம் தள்ளும் வழி
நாடி பிழைக்க வந்தேன்
பொல்லாத உலகில் நானும் வாழ வழி தேடி உழைக்க வந்தேன்
காலை மாலையென நின்றேன்
களைத்து மலைத்து அமர்ந்தேன்
வதங்காமல் வாங்கி விட்டால்
வாடாமல் வாழ்ந்து விடுவேன்!😭
- தஞ்சை த இராமநாதன்
