ஒரு கவிஞரின் குரல்

ஒரு கவிஞரின் குரல்

கொண்டாட்டம் என்றாலே வண்ணமிகு வான வேடிக்கைதான் என்றைக்கும் பழமையான வாடிக்கை
கொண்டாட்டம் என்றதுமே புரியாதபடி பாட்டைப் பாடி ஆட்டம் போடுவதுதான் இன்றைக்கு புதுமையான வேடிக்கை

யார் அதிகவிலை வெடியை வெடித்தார்கள் என்பதைப் பொறுத்ததுதான் செல்வ நிலை என்பது என்றைக்கும் பழமையான வாடிக்கை
யார் அதிகவிலை மதுவைக் குடித்து புகையைப் பிடிப்பதைப் பொறுத்ததுதான் நவீன செல்வ நிலை என்பது இன்றைய புதுமையான வேடிக்கை

கவிஞரின் குரலில்...
உள்ளது உள்ளபடியே உள்ளதால் உள்ளத்தின் ஒலியெனவே உணர்ந்தேன்!

- தஞ்சை த.இராமநாதன்

குழந்தை இதயம் நமக்கு உள்ளதா?

 

குழந்தை இதயம் நமக்கு உள்ளதா?

பாரபட்சம் பார்க்காது பார்ப்போரை பாசத்தோடு பார்த்து குதூகலித்து எளிதாகச் சிரிக்கும் அன்பான இதயம்

ஆள் பார்த்து இடம் பார்த்து அழாமல் அழத் தோன்றும் போதெல்லாம் சுதந்திரமாக அழும் அழகான இதயம்

திறந்த மனதோடும் மலர்ந்த முகத்தோடும் வெளிப்படையாக நேசிக்கும் வெகுளியான இதயம்

பயமற்ற மனதோடும் ஆழமான நம்பிக்கையோடும் தூக்குவோர் கைகளில் தூங்கும் தூய்மையான இதயம்!

- தஞ்சை த.இராமநாதன்

கடக்கும் ஆண்டு கடந்த ஆண்டாகும்

 

கடக்கும் ஆண்டு கடந்த ஆண்டாகும்

ஓர் ஆண்டைக் கடக்கப் போவதை எண்ணி எப்படிக் கடந்தோமென எண்ணினால் என் மனம் துள்ளுகின்றது
ஓர் ஆண்டில் இறந்தோரின் கணக்கை எண்ணி எண்ணிய எண்களால் என் கண்கள் கலங்குகின்றது

துரோகங்களை எண்ணினால் அதைத் துரத்தித் தூரமாக ஒதுக்கி ஒதுங்கி ஓங்காரமாய் ஒலிக்கச் சொல்கின்றது
தியாகங்களை எண்ணினால் வீரமாகத் தீரமாக நினைத்துப் போற்றிப் புகழ்ந்து கையோடு கைகோர்க்கச் செல்கின்றது

பாவங்களைப் போக்க பரிகாரத்தைவிட
தியானத்தைச் செய்து மனம் அமைதி பெற தூண்டுகின்றது
நடந்ததைப் பாடமாகக் கற்று நடக்கப் போவதை தேர்வாக எண்ணி தேர்ச்சி பெற தோன்றுகின்றது!

- தஞ்சை த.இராமநாதன்

எழுத்து சொல் பேச்சு

 

எழுத்து சொல் பேச்சு

எழுதிய எழுத்தை எழுதாது எழுதும் எழுத்தையும் எழுதாத எழுத்தாக எழுதினால்தான் எழுத்தாகுமென எழுதுகின்றீரா?

சொல்லிய சொல்லைச் சொல்லாது சொல்லும் சொல்லையும் சொல்லாத சொல்லாகச் சொன்னால்தான் சொல்லாகுமென சொல்கின்றீரா?

பேசிய பேச்சைப் பேசாது பேசும் பேச்சையும் பேசாத பேச்சாகப் பேசினால்தான் பேச்சாகுமென பேசுகின்றீரா?

- தஞ்சை த.இராமநாதன்

பாசப் பிணைப்பு

எங்கே எப்படி இருந்தாலும் பெற்றப்
பிள்ளை அழக் கேட்டால் அதிர்ந்தோடி கட்டிப் பிடித்துத் தூக்கும் தாயின் செயல் தொப்புள் கொடி பந்த பாசப் பிணைப்பால்

தன்னோடு பிறந்த தம்பிகளை தங்கைகளைத் தூக்க முடியாமல் தூக்கிச் சுமந்து நடந்தும் ஓடியும் விளையாடியது பாசப் பிணைப்பால்

ஒரே மூக்கு இலையில் சுற்றி அமர்ந்து சிரித்துப் பேசி இனிப்புப் பொங்கலை சுவைத்து ரசித்துச் சாப்பிட்டு மகிழ்ந்து உறவாடியது பாசப் பிணைப்பால்

அம்மா அப்பாவை பண்போடு மதித்து உரிமையோடு சிற்சிறு சண்டையிட்டு           கடமை தவறாது கவனித்துப் பேணிக் காத்து வாழ்ந்தது பாசப் பிணைப்பால்

எத்தனை வயதானாலும் பெற்றோர் இறந்தால் அய்யோவென அலறித் துடித்து தேம்பித் தேம்பிக் கண்ணீர் தீரும்வரை அழுதது பாசப் பிணைப்பால்

தாயில்லாப் பிள்ளையாயினும் உடலில் அடிபட்டால் அடுத்த நொடியே அம்மா எனக் கத்துவதும் பாசப் பிணைப்பால்
தாயில்லாததை உணர்ந்தாலும் வலியைத் தாங்காது அய்யோ அம்மா எனக் கதறிக் கண்ணீரில் நனைவதும் தாயின் பாசப் பிணைப்பால்!

- தஞ்சை த.இராமநாதன்

பாசப் பிரிவு

 

ஒன்றோடு ஒன்றாக பிறந்து வாழ்ந்து வளர்ந்த பிறகு மறந்து வாழ்வது பாசப் பிரிவு

ஓடோடி விளையாடி உரிமையோடு உறவாடி இப்போது பேசாத நட்பு பாசப் பிரிவு

ஒரு வீட்டுக் குழம்பைப் பல வீட்டில் சுவைத்து இப்போது வீட்டைப் பூட்டி உண்பது பாசப் பிரிவு

விசேஷ வீட்டுத் தட்டு முட்டுச் சாமானைத் தாராளமாய்த் தந்ததுபோய் வாடகைச் சாமான் வந்தது பாசப் பிரிவு

இறந்த வீட்டில் எல்லோரும் அழுதது போய் வாடகைக்கு அமர்த்தி அழ வைப்பது பாசப் பிரிவு

இவையெல்லாம் போனதே எனப் பெருமூச்சை விடும்போது சொட்டுக் கண்ணீர் வருகிறதே அதுவும் பாசப் பிரிவே!

- தஞ்சை த.இராமநாதன்

நண்டாக மண்டாகவா வாழ்வாக? (கிராமிய பாடலாக)

 

              (கிராமிய பாடல்)

பிள்ளையாக பிறவியாக பிறந்தாக        வாண்டாக வாலிபராக வளர்ந்தாக

வசதியாக வாழ்க்கையை வாழ்ந்தாக    கண்டதைக் காட்சியாக கண்டாக   

திருடனாக திரிந்தவக திருந்தாதவக
களவாக கபடமாக கழிவாக

நண்டாக நாடுவாக நன்றாக
மாள்வாக மடிவாக மண்டாக!

- தஞ்சை த.இராமநாதன்

பெரியவர் Auditor அய்யாவு

 

Auditor அய்யா இருக்கிறாரா என மெதுவாக கேட்டாலும் 
Auditor அய்யாவுவா என பொதுவாக கேட்பார்கள்

பிறந்தது சோழ மண்டலத்தில் உள்ள கிளாமங்கலம் இல்லம்
சிறந்தது கோவை மண்டலத்தில் உள்ள சேரன் நகர் இல்லம்

பல்லாயிரம் தென்னையை வளர்த்து பிரபலமானார் சொந்த பண்ணையால்
பல பண்ணையாட்களை வாழ வைத்து பிரபலமானார் இந்த பண்ணையார்

பகுத்தறிவுப் பண்போடு இருக்கும் நானறிந்த வல்லவரான நல்லார்
உற்றார் உறவினரை உயர வைக்கும் அடித்தள தூணாக உள்ளார்

நலத்தோடு வாழ்க பல்லாண்டு!

- தஞ்சை த.இராமநாதன்

ஆட்சிக்கு வர ஆசையா?

யாரும் செய்யாததைச் செய்து லாபம் பெறுவதற்காக ஆட்சிக்கு வர ஆசையா?
யாரும் செய்ததையே செய்து லாபம் பெறுவதற்காக ஆட்சிக்கு வர ஆசையா?

கஷ்டப்படுபவர்கள் கஷ்டப்படாமல் இருக்க ஆட்சிக்கு வர ஆசையா?
கஷ்டப்படுபவர்களைக் கஷ்டப்பட வைக்கவே ஆட்சிக்கு வர ஆசையா?

உண்டியலைக் காக்காத கடவுள் எதற்கு என ஏளனம் செய்து இகழ்வோர் ஆட்சிக்கு வர ஆசையா?
உண்டியலை உடைக்கும் பகுத்தறிவாதி ஆட்சிக்கு வரக் கூடாது என்போர் ஆட்சிக்கு வர ஆசையா?

எந்த வளமும் இல்லாத ஒரு நாட்டை அத்தனை வளமும் உள்ள நாடாக மாற்ற முடியுமா?
சிங்கப்பூரை மாற்றிக் காட்டினாரே
லீ குவான் இயூ எனும் மாமனிதர்!அவரைப் போலவே மாற்றத்தைத் தரவே ஆட்சிக்கு வர ஆசையா?

- தஞ்சை த.இராமநாதன்

யானை மேல் புலியா?

 

யானை மீது புலியை பார்த்ததும் A1 என்பவர்களும் இருக்கின்றார்கள்
புலியை யானை மீது பார்த்ததும் AI என்பவர்களும் இருக்கின்றார்கள்

இதைப் பார்த்ததும் ஆனந்தக் கண்ணீர் வடிப்பவர்களும் இருக்கின்றார்கள்
இதைப் பார்த்ததும் அபத்தக் கண்ணீர் வடிப்பவர்களும் இருக்கின்றார்கள்

பிறந்ததிருந்து இறந்த பின் பிறவாமை நிலையைத் தேடுவோர் வெகுசிலர்
பிறந்து பிறரை வருத்தி இறக்கும் முன் இரந்துவிடுவோர் வெகுபலர்!

- தஞ்சை த.இராமநாதன்

குருட்டுக் கூட்டம்

 

வேண்டாததை வேண்டுமென்றே பேசி வேண்டாத வம்பை இழுப்பதும்
வேண்டியதை வேண்டுமென்றே பேசாமல் வேண்டாத வீம்பை வளர்ப்பதும் வேலை இல்லாதவர்களின் வீணான வேலை

வேண்டும்போது வேண்டியது கிடைக்காமல் போவதும்
வேண்டாதபோது வேண்டாதது  கிடைத்து விடுவதும் வேண்டுதலைவிட வேண்டாமையே விவேகம் எனும் நிலை

கூட்டமாக கூடினால் பேசக் கூடாததை
கூட்டிப் பேசி கூடிய கூட்டத்தையே கூண்டோடு திசைத் திருப்புவதும்
கூடிய கூட்டத்தை கூட்டத்தோடு கூட்டமாக கோசம் போட வைத்து குருட்டுக் கூட்டமாக மாற்றுவதுதான் அரசியல் எனும் வலை!

- தஞ்சை த.இராமநாதன்

தலைமுறை தலைமுறையாக

 

தலைமுறைக்குத் தலைமுறை தடம்மாறுகிற மாற்றம்
தலைமுறைக்குத் தலைமுறை தடுமாறுகிற மாற்றம்

தலைமுறையைத் தலைமுறை தவறாது ஏமாற்றும்
தலைமுறைக்குத் தலைமுறை தவறாது ஏமாறும்

உடலும் உணர்வும் சுருங்கி அடங்கிப் போவது ஒரு தலைமுறை
உண்மையும் உரிமையும் சுருங்கி அடங்கப் போவது மறு தலைமுறை

கொடுத்துக் கொடுத்து கெட்ட பெயரை எடுத்து ஓய்கின்றது ஒரு தலைமுறை
எடுத்து எடுத்ததைத் தொலைத்து அலைய போகின்றது மற்றொரு  தலைமுறை!

- தஞ்சை த.இராமநாதன்

அணில் கடித்தால் அது கனிந்த கனி

 

உண்ணலாம் என மனிதன் எண்ணாத வரை அணில் பழத்தை உண்ணலாம்
உண்ணலாம் என மனிதன் எண்ணிய முதல் அணில் பழத்தை எண்ணலாமா?

காயை உண்டு கனியை உண்டு மீனை உண்டு மானையும் உண்பார் மனிதர்                                    காய்த்தது கனியும்வரை காத்திருந்து கனிந்தபின் உண்ணுவார் அணிலார்!

உண்டதை உண்டு உண்ணாததையும் உண்டு வாழ எண்ணும் மனித மனமே...
உண்டபின் உண்ண உணவில்லா அணிலையும் உண்பது சரியா இனமே?

- தஞ்சை த.இராமநாதன்