வீரமும் சோரமும்
நற்குடியில் பிறந்து விவேகத்தோடு கால்மேல் கால் போட்டு வேளைப் பார்க்காது காலை ஆட்டுவது வீரம்! நாறக்குடியில் பிறந்து விவகாரத்தோடு காலை மாலைப் பார்க்காது ஆளைப் பார்த்துக் கால் ஆடுவது சோரம்!
மனதில் உள்ளதை உள்ளபடி உரைத்து உரைத்ததை உரைத்தபடி உரைக்கும்படி உணர வைப்பது வீரம்!
மனதில் ஊறாததை உளறாது உரைத்து உரைத்ததை உரைக்காதபடி உணர்த்தி உணர்வற்று வாழ்வது சோரம்!
- தஞ்சை த இராமநாதன்
தேர்தல் நேரம்
செய்யவே முடியாததை செய்வோமென சொல்லித் திரிவதும் தேர்தல் நேரத்தில்
செய்து முடிக்காததைச் செய்தோமென சொல்லித் திரிவதும் தேர்தல் நேரத்தில்
செல்லாத போக்கிலும் செல்வோமென சென்று வருவதும் தேர்தல் நேரத்தில்
செல்லாத வாக்கிலும் வெல்வோமென வென்று வருவதும் தேர்தல் நேரத்தில்
சொல்லியபடியே கிள்ளிக் கொடுத்து வெற்றிப் பெறுவதும் தேர்தல் நேரத்தில்
சொல்லாதபடியும் அள்ளிக் கொடுத்து
வெற்றிப் பெறுவதும் தேர்தல் நேரத்தில்
செலவைச் செய்து கோடியைப் பார்க்க ஓட்டமாய் ஓடுவதும் தேர்தல் நேரத்தில்
செயலைச் செய்து கேடியைக் காக்க
கூட்டமாய் கூடுவதும் தேர்தல் நேரத்தில்!
- தஞ்சை த இராமநாதன்
