எளிமை இனிமை முழுமை (999 - 1000)

 

எளிமை இனிமை முழுமை (999 - 1000)

மலர் விரிந்து மணம் தவழ்வதுபோல்
முகம் மலர்ந்து சுதந்திரமாக நகைத்தாலும்
மனம் திறந்து வெளிப்படையாக அழுது நமது கண்ணீரை உதிர்க்க முடியுமா?

எழுத்தாக சிரிப்பாக உள்ளுணர்வை வெளிப்படுத்த முடிந்த நமக்கு
ஆழ்மனதின் அமைதிக் குரலை எப்போதாவது ஒலிக்க முடியுமா?

எதிலும் எளிமை கண்டு
கண்மூடி மாபெரும் காட்சி கண்டு
ஆனந்தத்தில் திளைத்தால்
தித்திக்காதா நமக்கு?

- தஞ்சை த.இராமநாதன்

எதுவும் ஏதுவாகலாம்

 

எதுவும் ஏதுவாகலாம்

எதுவாக இருந்தாலும் ஏதுவாக இருந்தால்
ஏதுவாக இருப்பதை எதுவானாலும் வளைத்துப் போடுவோர் ஒருபுறம்

ஏதுவாக இருப்பது எதுவாக இருந்தாலும்
எதையும் எப்போதும் ஏதுவாக்கி வளைக்க முயலாதோர் மறுபுறம்

வாக்கைக் கொடுத்து வாக்கை எடுக்க
பணத்தைக் கொடுத்து பணத்தை எடுப்போர் ஒருபுறம்

பணம் கிடைத்து வாக்கைக் கொடுத்து
மானம் அழிந்து மதிகெட்டு வாழும் பாவப்பட்டோர் மறுபுறம்!

- தஞ்சை த.இராமநாதன்

துரோகியைத் துரத்து

 

துரோகியைத் துரத்து

இப்போது நடப்பது எப்போதோ நடந்தும் இருக்கலாம்

எப்போதோ நடந்தது இப்போது நடந்தும் இருக்கலாம்

அப்போதே நடந்தது எப்போதும் நடக்கவும் இருக்கலாம்

அப்போதோ இப்போதோ எப்போதோ துரோகத்தைத் துரத்தினால் தப்பலாம்!

- தஞ்சை த.இராமநாதன் 

வாக்களித்தல்

 

வாக்களித்தல்

வாக்களிப்பில் வாக்களித்துத் தெளிவோடு தேர்ந்தெடுத்து
உரிமையை உறுதிப்படுத்து

படிப்போடு பண்பட்டவரை
நெறியோடு நேர்மையானவரை
வரவழைத்திடு கூடுமானவரை

உரிமையைக் காத்திடுவாருக்கு
உணர்வை மதித்திடுவாருக்கு
மதியுடையாருக்கு வாய்ப்புக் கொடு

வாக்கை செலவிற்காக அழிக்காது 
உம் செல்வாக்கிற்காக அளித்தால் வளத்தோடு வாழ்ந்திடும் தமிழ்நாடு!

- தஞ்சை த.இராமநாதன்

ஈடுபாட்டோடு ஈடுபடு

 

ஈடுபாட்டோடு ஈடுபடு

எந்தச் செயலில் எவர் ஈடுபட்டாலும் அந்தச் செயலில் அவர் ஈடுபட அவருக்கு ஈடுபாடு வேண்டும்
நல்ல செயலில் எவர் ஈடுபட்டாலும்
அந்தச் செயலில் அவருக்கு நல்ல ஈடுபாடு வேண்டும்

எப்போதோ வளர்ந்த எம் தமிழை இப்போது உம்மால் வளரும் தமிழெனச் சொன்னால் அது ஈடுபாடா?

சிற்றரசன் கட்டபொம்மனைப் போற்றத் தெரிந்த உமக்கு
தமிழ்ப் பேரரசன் இராசராசனைப் போற்றாத உமக்கு

பேரரசன் இராசேந்திரன் தென்கிழக்காசியாவை ஆக்கிரமித்ததைப் பேசாத உமக்கு
தமிழின்மீது ஈடுபாடா?

தமிழ் பேசாத ஆளைத் தமிழன் எனச் சொல்லித் தலைமை ஏற்க வைத்து தலையாட்டும் உமக்குத்                                    தன்மானத்தோடும் தமிழனின் உணர்வோடும் ஈடுபட எப்படி வரும் ஈடுபாடு?

- தஞ்சை த.இராமநாதன்

காற்று வாக்கில் வாக்கைப் பற்றி

 

காற்று வாக்கில் வாக்கைப் பற்றி

வாக்கைப் போடப் போகிறவருக்கோ காசால் வெட்டி விடுகிறார்களாம்
வாக்கைப் போட்டு முடித்தவருக்கோ மையால் குத்தி விடுகிறார்களாம்

கத்திச் சுத்தாத புத்தி இல்லாதவர்
துண்டைக் காட்டி வெல்கிறாராம்
சுத்திக் கத்தும் யுக்தியே இல்லாதவர் தொண்டையும் கட்டி தோற்கிறாராம்

சின்னத்தைப் பார்ப்பவர்கள் வேட்பாளர் எண்ணத்தைப் பார்த்து வாக்களிப்பதே இல்லையாம்
சன்மானத்தைப் பார்ப்பவர்கள் தமிழனின் தன்மானத்தைப் பார்த்து வாக்களித்ததே இல்லையாம்!

உண்மையா?

- தஞ்சை த.இராமநாதன்

உயிர்வாழ உண்ணுக

 

உயிர்வாழ உண்ணுக

அசைவ உணவை உண்ண உயிரைக் கொல் என்ற வெறி உணர்வு போதும்
சைவ உணவை உண்ண உணவைக் கொள் என்ற நெறி உணர்வு போதும் 

அசைவம் உண்போர் எல்லோரும் கொல்லும் வெறியோடும் இல்லை
சைவம் உண்போர் எல்லோரும் கொள்கை நெறியோடும் இல்லை

உயிர்வாழ மட்டும் உணவை உண்டு வாழ்வோர் நாமமறிந்த நன்மக்கள்

உணவை உண்பதற்கே உயிர் வாழ்வோர் நாமறிந்த நம்மக்கள்!

- தஞ்சை த.இராமநாதன்

சொல்லுமுன் தெளிந்து சொல்

 

சொல்லுமுன் தெளிந்து சொல்

சொல்லும் சொல்லைச் சொல்லுமுன் தெளிந்து தெரிந்து தெளிந்தபின் சொன்னால் சொன்னது சொல்லாகும்

பேச்சுக்காக பேசியப் பேச்சையெல்லாம்
பேச்சைக் கேட்போரும் கேட்பதில்லை
பேச்சைப் பேசியவரும் கேட்பதில்லை

பொய்யை மெய்யைப் போல் பேசி பொய்யைப் பேசப்பேச மெய்யையே பொய்யாக்கிடுவோர் மெய்யான பொய்யர்கள்!

- தஞ்சை த.இராமநாதன்