வருடந்தோறும் வரும் மே தினம்
தொழிலாளி அதிகரித்தால்
தொழிலாளியை வைத்து
பிழைப்பாளி அதிகரிப்பதும்
உழைப்பாளி அதிகரித்தால்
உழைப்பாளியை வைத்து
ஏய்ப்பாளி அதிகரிப்பதும்
போராட்டம் அதிகரித்தால்
போராட்டத்தை வைத்து
பேர ஆட்டம் அதிகரிப்பதும்
இம் மே தினம் வந்ததும்
இம் மே தினத்தை வைத்து
இம்மே எனக் கத்துவதும்
உலகெங்கும் மாறாதோ என்றும்?
- தஞ்சை த.இராமநாதன்
'அவர்கள்' என்பது ஒருமையா?
ஒருவர் பெயரை எழுதியபின் "அவர்கள்" என எழுதுவது சரியாகத் தெரியவில்லை
ஒருவர் பெயரைச் சொல்லி அவர்களே எனச் சொல்வதும் சரியாகத் தெரியவில்லை
மரியாதைக்குரிய தலைவரே எனப் பேசுவது தவறாகத் தெரியவில்லை
மரியாதைக்குரிய தலைவர் அவர்களே என்பது சரியாகத் தெரியவில்லை
அவர் பேச இருக்கின்றார் எனச் சொல்வது தவறாகத் தெரியவில்லை
அவர் பேச இருக்கின்றார்கள் எனச் சொல்வது சரியாகத் தெரியவில்லை
He/She என இருபாலரை வேறுபடுத்திச் சொல்வது தவறாகத் தெரியவில்லை
ஆண்/பெண் இருபாலரையும் அவரெனச் சொல்வது சரியாகத் தெரியவில்லை
Honourable Prime Minister என்பது தவறாகத் தெரியவில்லை
மாண்புமிகு பிரதமர் அவர்கள் என்பது சரியாகத் தெரியவில்லை
அவரை அவரென எவர் சொன்னாலும் அது தவறாகத் தெரியவில்லை
அதை அவர்களென எவர் சொன்னாலும் அது சரியாகத் தெரியவில்லை!
- தஞ்சை த.இராமநாதன்
