கிழவர் சொல் கேடில
அனுபவப்படாத பாட்டிச் சொல்லைத் தட்டினாலும் அனுபவப்பட்ட பாட்டன் சொல்லைத் தட்டாதே
அப்படித் தட்டினால் தடமும் மாறித் தடுமாற்றமும் தப்பாது
அதிகார ஆளுமை மிக்க ஆளிடம் அர்த்தமற்ற கூக்குரலை எழுப்பி ஆடம்பர அராஜக அடியாட்களால் அடிபட்டு அழிவைத் தேடாதே
பழுத்த கிழவர்களில் பக்குவப்பட்ட
Cleverகளும் உண்டு அவர்கள் பண்பட்ட கருத்துகளைச் சொல்வதுமுண்டு!
- தஞ்சை த.இராமநாதன்
ஒழுக்கப் பண்பு கொள்
அன்போடு பேசி ஆறுதல் சொல்லி இயல்பான ஈகைப் பண்பைக் கொள்
உண்மையைப் பேசி ஊக்கத்துடன் வாழ எளிமையை ஏற்கும் பண்பைக் கொள்
ஒரே குலத்தில் ஓரணி உலகத்தில் சகோதர நல்லிணக்கத்தைக் கொள்
பெரியோரைத் துதித்து வயதில் பெரியாரை மதித்து அமைதி கொள்
இரக்கக் குணத்தோடு இல்லார்க்குக் கொடுக்கும் குணத்தையும் கொள்
பொறாமைப்படுவதை விரட்டி விட்டு போட்டி போட கற்றுக் கொள்
தேவையற்ற கோபத்தைத் தவிர்த்து
தேவையான கோபத்தைக் கொள்
தன்னிகரில்லாத தமிழை வளர்க்க கவிதை எழுத ஆர்வம் கொள்!
- தஞ்சை த.இராமநாதன்
ஐம்பூதம் போற்றிடு
கரையான் புற்றின் நிலத்தடியில்
வானம் பொழிந்த நீர் இருக்குமென
அங்கே கிணறு வெட்ட புறப்பட்டு
சாம்புராணி புகையோடு வழிபட்டு
மண்ணை வெட்ட மண்வெட்டி எடுத்து
சுற்றளவினுள் குழியைத் தோண்டி
பாறையை உடைக்க கடப்பாரை எடுத்து
தீப்பொறி பறக்க பாறையை அகற்றி
அதன்பின் குறுமணலை அள்ளினால்
சலசலவெனும் ஓசையோடு நீர் ஊறும்
ஊறிய நீர் தெளிந்த பின் மேலிருந்து
பார்த்தால் கிணற்றினுள் ஆகாயம் தெரியும்
ஆகாயம் மட்டுமா? நாம் போற்றுகின்ற ஐம்பூத ஐக்கியமும் தெரியும்!
- தஞ்சை த.இராமநாதன்
ஏணியாய் வாழ்ந்திடு
ஏறிச் செல்வோர் மிதித்து உதைத்துச் சென்றாலும் ஏணியாகவே எப்படி நிற்கிறாய் ஏணியே?
ஏறிச் சென்றோர் இறங்க நேர்ந்தாலும் இறங்குவோர் இறங்கவும் இரங்கியே நிற்கிறாயே ஏணியே?
ஏணிப்படியே ஏன் இப்படி ஏணியோடு ஏணியாக இணைந்தாய் நகராத படியே? நகர்த்தி நகரத்திற்கு கொண்டு சென்றாலும் நகர்ந்த நகரப்படி மாறாமல் நகராத படியாக இருப்பதெப்படி நல்ல படியே?
மனிதன் ஏணியாக வாழ முயன்றிடலாம் ஏணியாகவே வாழ்ந்து முடிந்துவிடலாகாது!
- தஞ்சை த.இராமநாதன்
எளிமை கண்டு இகழேல்
உடலின் மாய அழகை அங்கம் அங்கமாய்ப் போற்றிப் புகழாதீர்
உள்ளத்தின் தூய அழகை எங்கும் எப்போதுமே தூற்றி இகழாதீர்
அர்த்தமற்ற நாத்திகத்தை ஆட்டம் போட்டு ஆளைக் கூட்டிப் புகழாதீர்
அர்த்தமுள்ள ஆத்திகத்தை கூட்டம் போட்டுக் கொடியைத் தூக்கி இகழாதீர்
உழைக்காத உணவைத் திமிரோடு அமர்ந்து தின்னுவதைப் புகழாதீர்
உழைத்த உணவை ஆற அமர்ந்து குடும்பத்தோடு உண்ணுவதை இகழாதீர்
நடன நாட்டியத்தில் கவர்ச்சியாக நடித்தவரை உயர்த்திப் புகழாதீர்
உடையிலும் நடையிலும் எளிமையாக நடப்பவரைத் தாழ்த்தி இகழாதீர்!
- தஞ்சை த.இராமநாதன்
ஊழ்வினை எதிர்த்து வெல்
உடல் மனம் ஆன்மா மூன்றையும் தன்னுள் அடக்கி ஆள்வது ஊழ்வினை
உடலழகில் மயங்கும் மனம் ஆன்மாவை மறந்து வீழ்வதும் ஊழ்வினை
கோவலன் கேவலமாக மனம் ஓடியபடி ஆடி வாடி இறந்தது ஊழ்வினை
பிரிந்தோடிய கணவனுக்காக ஓடோடி மதுரையை எரித்ததும் ஊழ்வினை
தட்டுத் தடுமாறி ஆண்டவர்களை ஆண்டவனை விட துதிப்பது ஊழ்வினை
ராஜராஜனின் தனிச்சிறப்பை மறைத்து நரிபோல் ஊழையிடுவதும் ஊழ்வினை
ஊழ்வினையை எதிர்த்து வெல்வது ஊழ்வினையினுள் உள்ள ஊழ்வினை
ஊழ்வினையைத் தவிர்த்து வாழ்ந்திட பெற்றிடு ஆன்மிக குருவின் அருளினை!
- தஞ்சை த.இராமநாதன்
உண்ணும் முன் உழவைப் போற்று
உழுதவரெல்லாம் உழுததையும் விட்டு உழுத ஊரையும் விட்டுவிட்டு மற்ற ஊருக்கு ஓடுகிறார்கள்
உழுபவரெல்லாம் மாட்டையும் விட்டு உழுத கலப்பையையும் விட்டுவிட்டு உழவூர்தியை நாடுகிறார்கள்
உழுதவரே உழவை நினைக்க விரும்பாத உலகில் உண்பவரா நினைப்பார்? உடனடி உணவை உண்டு பெருத்த உலகினரா உழவைப் போற்றுவார்?
உண்மையாக உழைத்தவனை வதைத்து உழவனின் ஊதியத்தைக் குறைத்து உழவின் பெருமையை மறைத்தாலும் உண்ணும் முன் உழவைப் போற்றாதோர் உண்ட பின் உணர்வோடு போற்றுக!
- தஞ்சை த.இராமநாதன்
சிங்கப்பூர்
ஈதலில் உயர்வு கொள்
கொடுத்த ஈதலில் உயர்வு கொண்டார் தரணியில் குறைவிலும் குறைவே
கொடுத்துக் கொடுத்து நொடித்தோர் தரணியில் கூடுதலிலும் கூடுதலே
வீட்டைக் கோட்டை விட்டு நாடு நாடென ஓடியோர் வறுமையில் வாடுவர்
வாங்கி வாங்கி வறுமையைக் கடந்தோர் கொடுத்தவரை ஒருமையில் சாடுவர்
கொடுக்கும் உள்ளம் உள்ளாரிடம் கொடுக்க செல்வம் சேருவதுமில்லை
கொடுக்காத உள்ளம் உள்ளாரிடம் கோடிச் செல்வம் சேராமலுமில்லை
அளவோடு பொருளைக் கொடுத்து வாழ்ந்தால் ஈதலால் உயர்வே
உள்ளதை எல்லாம் சுரண்டிக் கொடுத்து வீழ்ந்தால் ஈதலால் தாழ்வே
- தஞ்சை த.இராமநாதன்
சிங்கப்பூர்
