படி படிப்படியாய்ப் படி

 

படி படிப்படியாய்ப் படி

வழக்கப்படி பதவிக்கு முன்படி வழியாக வந்தால் அது பலத்தின் படி
பழக்கப்படி பதவிக்குப் பின்படி வழியாக வந்தால் அது பணத்தின் படி

மரத்தால் செய்யப்பட்டு தானியத்தை அளப்பது தமிழரின் மரக்கால்படி
மறத்தால் செயல்பட்டு மானத்தைக்      காப்பது தமிழரின் மரபுப்படி

கசடறக் கற்று மரியாதையைப் பெற்று பெருமையோடு வாழ்ந்தது அக்காலப்படி
கசடைக் கற்று மடமையைப் பெற்று
வெறுமையோடு வாழ்வது இக்காலப்படி

அடிதடி நடத்தி அக்கிரமம் அநியாயம் செய்வது சதியின் நாற்றப்படி
இடித்தும் வெள்ளம் பிடித்தும் பூமி ஆடியும் அழிவது விதியின் சீற்றப்படி

மூத்தோரை மதிப்பதும் கடவுளைத்      துதிப்பதும் வாழ்வியலில் ஏற்றப்படி
மூத்தோரை அவமதிப்பதும் கடவுளை
ஏய்ப்பதும் வாழ்வியலில் இறக்கப்படி!

- தஞ்சை த.இராமநாதன்

அடிக்கு அடி அடிக்கடி மாறும் அடிகள்

அடிக்கு அடி அடிக்கடி மாறும் அடிகள்

சிலப்பதிகாரம் முழுதும் பாசத்துக்கு வரிகளைத் தந்தவர் இளங்கோவடிகள்
பாரதத் தேசம் முழுதும் தேசத்துக்கு விடுதலைத் தந்தவர் காந்தியடிகள்
சத்திய ஞான சபையைத் தந்தவர்                        வடலூர் இராமலிங்க அடிகள்
சமர சுத்த சன்மார்க்க சங்கம் தந்தவர் திருக்கழுகுன்றம் மறைமலை அடிகள்

கோயில்களை நோக்கிச் செல்வோர் பலவிதமாகத் தூக்குவதற்குக் காவடிகள்
கோயில்களை நோக்கிச் செல்வோர்
பலவிதமாகத் தாக்குவதற்குக் கைத்தடிகள்
அறுத்த மரத்தை எடுத்துத் தொழில்    செய்யும் இடத்திற்குப் பெயர் மரவாடிகள்
அருத்தமதை உருக்கி எடுத்து தொழில் செய்யும் இனத்திற்குப் பெயர் மார்வாடிகள்!

- தஞ்சை த.இராமநாதன்

நம் தாயின் மொழி

 

நம் தாயின் மொழி

அம்மா அப்பா கொடுத்த மொழி
அன்போடு வீரம் படைத்த மொழி
ஆன்மிகம் வளர்த்துக் காத்த மொழி
ஆற்றலை வளர்த்துக் காக்கும் மொழி
இனிமையை கனியாகக் காட்டிய மொழி
இன்னாததை காயாகக் காட்டும் மொழி
உண்மையை உரைக்க உற்ற மொழி                                                                    உரிமையைப் பறைக்கவும் ஏற்ற மொழி 
ஊழ் வினையை விளக்கிய மொழி
ஊக்க உணர்வையும் விளக்கும் மொழி
எல்லா மொழிக்கும் மூத்த மொழி
எல்லா மதத்திற்கும் ஒத்த மொழி
ஏகாதிபத்தியத்தை ஏற்காத மொழி
ஏகபத்தினியை ஏற்கும் மொழி
ஐந்தாகக் காப்பியங்களைத் தந்த மொழி           
ஐந்தாக நிலங்களையும் தந்த மொழி
ஒப்புமைக் கொண்டு வாழ்த்திய மொழி
ஒவ்வாமைக் கண்டு வீழ்த்திய மொழி
ஔவையின் கவித்துவம் கொண்ட மொழி
ஔனத்தில் உடல் நலம் கண்ட மொழி
ஃகை குறளில் வெஃகாமையாகக் கண்ட மொழி
ஃகை இரும்பில் எஃகாகக் காணும் மொழி!

- தஞ்சை த.இராமநாதன்

நான் பார்த்த பாரதி பார்த்த சாரதி

 

நான் பார்த்த பாரதி பார்த்த சாரதி
           (மறைந்த நாள்: 6 July 2021)

ஒல்லியான உடலுடையார்
உறுதியான உளமுடையார்
சிரித்த முகமுடையார்
சிறந்த மனமுடையார்
வேகமான நடையுடையார்
விவேகமான உளமுடையார்
ஆன்மீக ஞானமுடையார்
பகுத்தறியும் பண்புடையார்

உலகச் செய்திகளை எல்லாம் அன்றாடம் அறிந்திருந்தார்
விளையாட்டுப் போட்டிகளின் போக்கையும் புரிந்திருந்தார்
போலி வாழ்க்கை வாழ்வோரை நன்கு உணர்ந்திருந்தார்
நல்லவர் என்ற பெயரோடு வாம்போவில் வாழ்ந்திருந்தார்

திருடும் திருடர்கள் திருந்த வேண்டும் என்பார்
அக்கிரம முரடர்கள் வருந்த வேண்டும் என்பார்
நல்லவரைத் தாராளமாய்த் தட்டிக் கொடு என்பார்
தீயவரைத் தயங்காமல் தட்டிக் கேள் என்பார்!

- தஞ்சை த இராமநாதன்                                         பதிந்த நாள்: 7 July 2021 

இறக்கும்வரை இறக்காது

 

இறக்கும்வரை இறக்காது

ஓடி ஆடி விளையாடிய நினைவுகள் இறக்கும்வரை இறக்காமல் இருக்கும்
பார்த்து ரசித்து மகிழ்ந்த நினைவுகளும் இறக்கும்வரை இறக்காமல் இருக்கும்

கண்களால் கண்டு களித்த நிகழ்வுகள்
இருக்கும்வரை மறக்காமல் இருக்கும்
பேசி மகிழ்ந்து திளைத்த நிகழ்வுகளும்
இருக்கும்வரை மறக்காமல் இருக்கும்

பிடித்த உடுப்பை உடுத்திய நினைவுகள் உடுத்தியவரிடம் உணர்வோடு இருக்கும் பிடித்துப் படித்த படிப்பின் நினைவுகளும் படித்தவரிடம் உயர்வோடு இருக்கும்

கடந்து வந்த கரடானப் பாதைகள்
கடந்தவருக்கு கனமாகவே இருக்கும்
கடக்கப் போகும் முரடானப் பாதைகளும்
கடப்பவருக்கு கனவாகவே இருக்கும்!

- தஞ்சை த.இராமநாதன்

குழலின் ஓசை குயிலின் பாசை

 

குழலின் ஓசை குயிலின் பாசை

குயிலுக்காக ஊதியக் கண்ணனும் இருந்ததுண்டு
கண்ணனுக்காகப் பாடியக் குயிலும் இருந்ததுண்டு
குயிலின் பாசையில் துன்பமும் இருந்ததுண்டு
குழலின் ஓசையில் துயரமும்     இருந்ததுண்டு

ஊதிய ஓசையை அசை போட்டுப் பார்ப்பவருமுண்டு
பாடியப் பாடலை இசை போட்டுக் கேட்பவருமுண்டு
ஊதியக் குழலை ஊதாமல் விட்டுவிட்ட கண்ணனுமுண்டு
பாடியப் பாடலை பாடாமல் விட்டுவிட்ட குயிலுமுண்டு

சூழலால் காலங்கள் மாறலாம் கானங்கள் மாறலாம்
குழலின் ஓசையும் மாறாது குயிலின் பாசையும் மாறாது!

- தஞ்சை த.இராமநாதன்

கால் நீங்குதலும் கால் வாங்குதலும்

 ப-பா, ம-மா, த-தா 

கால் நீங்குதலும் கால் வாங்குதலும்

காலையில் கால் நீங்கினால் கலையாகிவிடாதா?
கலையில் கால் வாங்கினால் காலையாகிவிடாதா?
மாலையில் கால் நீங்கினால் மலையாகிவிடாதா?
மலையில் கால் வாங்கினால் மாலையாகிவிடாதா?

பாடையில் கால் நீங்கினால் படையாகிவிடாதா?
படையில் கால் வாங்கினால் பாடையாகிவிடாதா?
தாடையில் கால் நீங்கினால் தடையாகிவிடாதா?
தடையில் கால் வாங்கினால்
தாடையாகிவிடாதா?

காடியில் கால் நீங்கினால்        கடியாகிவிடாதா?                                          கடியில் கால் வாங்கினால்    காடியாகிவிடாதா?                                      தாடியில் கால் நீங்கினால்      தடியாகிவிடாதா?                                            தடியில் கால் வாங்கினால்  தாடியாகிவிடாதா?

தோட்டியில் கால் நீங்கினால் தொட்டியாகிவிடாதா?
தொட்டியில் கால் வாங்கினால் தோட்டியாகிவிடாதா?
போட்டியில் கால் நீங்கினால்    பேட்டியாகிவிடாதா?
பேட்டியில் கால் வாங்கினால் போட்டியாகிவிடாதா?

போகத்தில் கால் நீங்கினால் பேகமாகிவிடாதா?
பேகத்தில் கால் வாங்கினால் போகமாகிவிடாதா?
மோகத்தில் கால் நீங்கினால் மேகமாகிவிடாதா?
மேகத்தில் கால் வாங்கினால் மோகமாகிவிடாதா?

மாதத்தில் கால் நீங்கினால்    மதமாகிவிடாதா?
மதத்தில் கால் வாங்கினால் மாதமாகிவிடாதா?
பாதத்தில் கால் நீங்கினால்    பதமாகிவிடாதா?
பதத்தில் கால் வாங்கினால் பாதமாகிவிடாதா?

பாலத்தில் கால் நீங்கினால்  பலமாகிவிடாதா?
பலத்தில் கால் வாங்கினால் பாலமாகிவிடாதா?
காலத்தில் கால் நீங்கினால்  கலமாகிவிடாதா?
கலத்தில் கால் வாங்கினால் காலமாகிவிடாதா?

மானத்தில் கால் நீங்கினால் மனமாகிவிடாதா?
மனத்தில் கால் வாங்கினால்
மானமாகிவிடாதா?
தானத்தில் கால் நீங்கினால்  தனமாகிவிடாதா
தனத்தில் கால் வாங்கினால்
தானமாகிவிடாதா?

- தஞ்சை த இராமநாதன்

பல்கலைக் கலைஞர்

பல்கலைக் கலைஞர்

சிறு வயதில் சுறுசுறுப்பான இளைஞர்
நடு வயதில் துடிதுடிப்பான கவிஞர்

அரசியலில் விவேகமான அறிஞர்
உரையியலில் வீரமான உரைஞர்

அறிவாலயம் பண்ணிய பொறிஞர்
சொல்லோவியம் பின்னிய வலைஞர்

கல்லக்குடி கொண்டவர் கலைஞர்
கடலோரம் குடிகொண்டவர் கலைஞர்!

- தஞ்சை த.இராமநாதன்

ஊரெங்கும் பூசம் தைப்பூசம்

ஊரெங்கும் பூசம் தைப்பூசம்

ஊரெங்கும் பூசம் தைப்பூசம்
பாரெங்கும் வேலன்மீது பாசம்
காவடிகளைத் தூக்கியபடி ஆட்டம்
கரவொலியைத் தட்டியப்படி பாட்டம்
(ஊரெங்கும் பூசம்...)

நல் அறுபடை வீடுகளிலோ கோசம்
நெல் அறுவடை வீடுகளிலோ சோகம்
அருள் வேண்டிடும் அரோகராவிலோ வேகம்
பொருள் வேண்டும் அரோகராவிலோ தாகம்
(ஊரெங்கும் பூசம்...)

தண்ணிப் போட்டதும் பாடுது சில தைப்பூசக் கூட்டம்
தண்ணிப் பிடித்ததும் வாடுது பல விவசாயக் கூட்டம்
கஷ்டத்தைப் போக்க இஷ்டப்பட்ட வேலோடு கோயிலிலே கூட்டம்
நஷ்டத்தைக் போக்க கஷ்டப்பட்ட நெல்லோடு வயலிலே கூட்டம்
(ஊரெங்கும் பூசம்...)

வேண்டியதைக் கொடுக்கும்போது வெற்றி வேலனாக்குவார் முருகா
விளைந்ததைக் கெடுக்கும்போது ஆண்டி வேலனாக்குவாரே முருகா!
(ஊரெங்கும் பூசம்...)

- தஞ்சை த.இராமநாதன்

உளறுவார் உலருவதை உணர்வாரா?

 

உளறுவார் உலருவதை உணர்வாரா?

உளறுவதை உணராமல் உளறுதலும் உளறுதலே
உளறுவதை உணர்ந்து உளறுவதும் உளறுதலே

உலருவதை உணராமல் உலர்த்துவதும் உலர்த்துதலே
உலருவதை உணர்ந்து உலர்த்துவதும் உலர்த்துதலே

உளறியவர் உளறி உளறி உளறுவதும்
உளறுதலே
உளறியவர் உளறி உளறி உணராததும் உளறுதலே

உலரும் உணவை உலர்த்தி உண்பதும் உணவே
உலராத உணவை உலராது உண்பதும்
உணவே

உளறும் உண்மையை உளறுவோரும் உணர்வாராக
உலராத உணவை உண்போரும் உணர்வாராக!

- தஞ்சை த.இராமநாதன்

சிலையை விரும்பாத மாமனிதர்

 

சிலையை விரும்பாத மாமனிதர்

அரை நூற்றாண்டுக்கு முன் சின்னஞ்சிறு மீன்பிடித் தீவு
அரை நூற்றாண்டுக்குள் அகில உலகிலும் முன்னணித் தீவு

இயற்கை வளமே இல்லாத சின்னஞ்சிறு  ஊர் சிங்கப்பூர்
மனித வளத்தை பாரெங்கிருந்தும் ஈர்க்கும் ஊர் சிங்கப்பூர்

தன்னால் முடியும் என்பதை முடித்துக் காட்டிய சிங்கப்பூர்
தன் மக்களை உலகிலேயே உயர்த்திக் காட்டிய சிங்கப்பூர்

அத்தனையையும் செய்து முடித்தவர் மாமனிதர் லீ குவான் இயூ
இத்தனையையும் வாழ்நாளிலேயே செய்து முடித்தவர் லீ குவான் இயூ

தனக்கு சிலை வைக்கக் கூடாது என்று உத்தரவிட்டார் லீ குவான் இயூ
பிறந்த இறந்த நாட்களை கொண்டாடி திண்டாட வைக்காத லீ குவான் இயூ

யாமறிந்தத் தலைவவர்களிலே இவரைப்போல் எங்கும் காணோம்!

- தஞ்சை த.இராமநாதன்