தடி

தடி

தடியெடுத்து தாவிக் குதித்து கம்பைச் சுழற்றி சுத்தியவர்கள் தடியாகிப் போனதுமில்லை அடியெடுத்து நடக்க மறுத்து குண்டாகிப் போனவர்கள் தடியாகாதுப் போனதுமில்லை

தடியெடுத்து தண்டல்காரனாக சுற்றியவர்கள் தண்டமாகாதுப் போனதுமில்லை
அடித்து ஆக்கிரமித்து அடுத்தவரைக் கெடுத்து வாழ்ந்தவர்கள் வீழ்ந்து போகாதுப் போனதுமில்லை

தடியெடுத்து சிலம்பமாடி மரபோடு சுத்தியவர்கள் நல்ல ஆட்டக்காரரென பெயரெடுக்காதுப் போனதுமில்லை                        அடிக்காதில் துளையிடாது ஆபரணம் அணிந்துத் திரிந்தவர்கள் குலப் பெயரை கெடுக்காதுப் போனதுமில்லை!

- தஞ்சை த இராமநாதன்

தாடி

 

தாடி

வாழ்ந்து தொடர்கின்ற சோகங்களைச் சொல்லவே வளர்க்கின்றார் பலபேர் தாடி வாழ்ந்து தொடர்கின்ற சுகங்களைச் சொல்லவும் வளர்க்கின்றார் சிலபேர் தாடி

சிறிதாக முளைத்தால் முளையிலேயே மழிக்கப்படுகிறது பலபேரின் தாடி
பெரிதாக தழைத்தால் முகத்திலேயே மதிக்கப்படுகிறது சிலபேரின் தாடி

தடவப் பார்த்தாலும் தடவும் அளவிற்கு வளர்வதில்லை பலபேருக்கு தாடி
தடவத் தடவ மீண்டும் தடவச் சொல்லும் அளவிற்கு                                                                      வளர்கின்றது சிலபேருக்கு தாடி

முனிவரானவருக்கு அக மாற்றத்தைக் காட்டுகின்றது பலபேரின் தாடி
ஞானியானவருக்கு முக மாற்றத்தைக் காட்டுகின்றது சிலபேரின் தாடி

இத்தாடி குறுந்தாடியோ நெடுந்தாடியோ இளந்தாடிகள் யாவும் கருந்தாடிகளே
அத்தாடி உந்தாடியோ எந்தாடியோ முதுந்தாடிகள் யாவும் வெண்தாடிகளே!

- தஞ்சை த இராமநாதன்

மூடி

 

மூடி

காடி கஞ்சியானாலும் மூடிக் குடித்தால் குடித்ததும் அகம் மகிழாது போகுமா?
மூடி மூஞ்சியானாலும் பாடி முடித்தால்
முடித்ததும் முகம் மலராது போகுமா?

ஓடி ஒளிந்து மெய்யை மூடி மறைத்தாலும் மறைத்த மெய் மெய்யாகாது போகுமா?
தேடி அலைந்து பொய்யை மூடி மறைத்தாலும்
மறைத்தப் பொய் பொய்யாகாது போகுமா?

நாடி அடங்கி வாய் மூடி ஒடுங்கிக் கிடந்தாலும்
அடங்காத வாய் மூடாதுப் பேசியது மறந்துப் போகுமா?
ஆடி தொடர் முகிலை மார்கழியில் ஆடாது பனி மூடித் தடுத்தாலும்
தடைப்பட்ட முகில் கோடை இடியோடு மாரி பொழிவது தடைப்பட்டுப் போகுமா?

மூடிய மூடியை மூடியபடியே மூடி வைத்தாலும்
வைத்த மூடியால் முடிவு விபரீதம் ஆகாதுப் போகுமா?
உலை வைத்து வேக வைக்கவே மூடி
பயன்பட்டாலும்
பயன்பட்ட மூடியே வடித்து எடுக்க பயன்படாமல் போகுமா?

- தஞ்சை த இராமநாதன்

முடி

 

முடி

குறுக்கு வாட்டில் வெட்டினாலும் அழுதுத் துடிப்பதுமில்லை
நெடுக்கு வாட்டில் சீவினாலும் துள்ளிக் குதிப்பதுமில்லை

சுத்தமாக மொட்டை அடித்தாலும் அதோடு முடிந்து விடுவதுமில்லை
மொத்தமாக நெட்ட வளர்த்தாலும் அதோடு ஒடிந்து விடுவதுமில்லை
 
முடி முடிந்தவரை முளைத்து வளராமல் அடியோடு மடிந்து விடுவதுமில்லை
முடி முடிந்தவரை முனிவராக்காமல் அடியாரை மடிய விடுவதுமில்லை

மீசையாக இருந்தாலும் முடியை முறுக்காமல் விடுவாருமில்லை
ஆசையாக இருந்தாலும் தாடியை நறுக்காமல் விடுவாருமில்லை!

- தஞ்சை த.இராமநாதன்

அகர முதல எழுத்திலும்...

 அகர முதல எழுத்திலும்...

நீதிக்குத் தலை வணங்கிய இனம்                      அநீதிக்குத் தலை வணங்கும் இனமானது ஏன்?

நியாயத்திற்குக் கை கொடுத்த இனம் அநியாயத்திற்குக் கை கொடுக்கும் இனமானது ஏன்?

யோக்கியனைப் போற்றிய இனம் அயோக்கியனைப் போற்றும் இனமானது ஏன்?

நாகரிகத்தைப் படைத்த இனம் அநாகரிகத்தைப் படைக்கும் இனமானது ஏன்?

மானத்தோடு வாழ்ந்த இனம் அவமானத்தோடு வாழும் இனமானது ஏன்?

ஜாக்கிரதையாக செயல்பட்ட இனம் அஜாக்கிரதையாக செயல்படும் இனமானது ஏன்?

சுத்தமான சுற்றுச் சூழலில் இருந்த இனம்  அசுத்தமான சுற்றுச் சூழலில் இருக்கும் இனமானது ஏன்?

- தஞ்சை த.இராமநாதன்

வயதுக்கேற்ற அழகு

வயதுக்கேற்ற அழகு

துள்ள முடிந்த வயதில் துள்ளியமை அழகு
துள்ளல் முடிந்த வயதில் துள்ளாமை அழகு
துள்ள முடிந்தபோது துள்ளி முடித்தமை அழகு
துள்ள முடியாதபோது தள்ளி வைத்தமை அழகு

சிரித்தாலே குழி விழுந்த இள முகமும் அழகு
சிரிக்காமலே குழி விழுந்த கிழ முகமும் அழகு
வாழ்ந்ததைப் பற்றி கவலைப்படாததும் அழகு
வாழ்வதைப் பற்றி கவலைப்படுவதும் அழகு

கற்க வேண்டியதை கற்காதக் காலமும் அழகு
கற்காதப் பாடத்தை கற்பிக்கும் காலமும் அழகு
ஓடி அடங்கி களைத்துப் போனதும் அழகு
நாடி அடங்கி இளைத்துப் போனதும் அழகு!

- தஞ்சை த.இராமநாதன்

தமிழர்களுக்கு தமிழ்நாட்டின் கேள்வி

தமிழர்களுக்கு தமிழ்நாட்டின் கேள்வி

கல்கத்தா கொல்கத்தா என்றானதும்          Calcutta Kolkatta என்றானது

பம்பாய் மும்பாய் என்றானதும்
Bombay Mumbai என்றானது

ஒரிசா ஒடிஷா என்றானதும்
Orissa Odisha என்றானது

பெங்களூர் பெங்களூரு என்றானதும்
Bangalore Bengaluru என்றானது

தமிழ்நாடு தமிழ்நாடாகவே இருந்தும்
Thamizhnatu Tamilnadu என்றானதேன்?

சென்னை சென்னையாகவே இருந்தும்
Sennai Chennai என்றானதேன்?

சோழன் சோழனாகவே இருந்தும்
Sozhan Cholan என்றானதேன்?

தூத்துக்குடி தூத்துக்குடியாகவே இருந்தும்
Thooththukkuti Tuticorin என்றானதேன்?

கோயம்புத்தூர் கோயம்பத்தூர் ஆகாமலே  
Coimpuththoor Coimbatore என்றானதேன்?

- தஞ்சை த.இராமநாதன்

வாசு சித்தப்பா - நினைவலைகள்

 

வாசு சித்தப்பா - நினைவலைகள்

வாசு சித்தப்பாவென நானழைப்பேன்
வாடா அய்யாவென அவரழைப்பார்

புதிதாய் சைக்கிளை வைத்திருப்பார்
சுத்தமான ஆடையை அணிந்திருப்பார்

ஆலத்தூர்வரை சைக்கிளில் பேசிக் கொண்டே சென்றதுண்டு
ஆலமரத்தடியில் பலதடவை பேசிக் கொண்டே சிரித்ததுண்டு

நாகரிகத்துடன் நகைச்சுவையாகப் பேசுவார்
நயவஞ்சகமின்றி மனம் திறந்துச் சிரிப்பார்

அனைவரும் படிக்க வேண்டும் என்பார்
அயல்நாடு செல்ல வேண்டும் என்பார்

வரும் பொங்கலுக்குப் போகும்போது சென்றுப் பார்க்கலாம் என்றிருந்தேன்
செல்லும்போது அவர் இருக்க மாட்டார் என்றச் செய்தியை இன்றறிந்தேன்

இறந்தார் என்றறிந்தவுடன்.....

மனதிலோடும் நினைவலையின்
துளிச் சிதறல் கண்ணில் தெரிகிறது!

- தஞ்சை த.இராமநாதன் 

இதற்குத் தேவை இது

 இதற்குத் தேவை இது

பட்டுக்குத் தேவை துட்டு
பாட்டுக்குத் தேவை மெட்டு
பூவுக்குத் தேவை மொட்டு
காவுக்குத் தேவை வெட்டு
மாதுக்குத் தேவை பொட்டு
சூதுக்குத் தேவை பகட்டு
தப்புக்குத் தேவை தட்டு
தவறுக்குத் தேவை திட்டு
பறிக்கத் தேவை துரட்டு
நரிக்குத் தேவை திருட்டு
மாடிக்குத் தேவை படிக்கட்டு
தாடிக்குத் தேவை முடிக்கட்டு
நீருக்குத் தேவை அணைக்கட்டு
நீதிக்குத் தேவை ஆணையிட்டு
முயற்சிக்குத் தேவை மெனக்கட்டு
முதிற்சிக்குத் தேவை மனக்கட்டு!

- தஞ்சை த.இராமநாதன்

ஆதிக்கு சமமானதே சமாதி நிலை

 

ஆதிக்கு சமமானதே சமாதி நிலை

வெய்யில் அடித்தால் சுடும் நிலைக்கு
மழையின் குளிரால் பெறுவது சமநிலை

தண்டவாளத்தில் தடம் புரளாது பயணம் தொடர ரயிலுக்குத் தேவை சமநிலை

அனைவருக்கும் பசியாற உணவுக் கிடைத்து விட்டால் எங்கும் சமநிலை

ஆணும் பெண்ணும் முழு உரிமையுடன் வாழ்ந்து விட்டால் வாழ்வில் சமநிலை

நல்லவரை வாழ்த்தி தீயவரை தாழ்த்திப் பேசினால் பேசும் பேச்சினில் சமநிலை

நியாயத்திற்குத் தட்டிக் கொடுத்து  அநியாயத்தை அதட்டிக் கேட்டால் சமநிலை

ஆதி இறை நிலைக்கு சமமாக மனிதன் வாழ்ந்தால் சம+ஆதி= சமாதி நிலை!

- தஞ்சை த.இராமநாதன்

ஆளுமைப் பெற்றோரின் மண்

 

ஆளுமைப் பெற்றோரின் மண்

பெரிய கோயிலின் கட்டிடக் கலையால்
பெயரைப் பதித்த பேரரசனின் தஞ்சை

மலையே இல்லாத ஊரிலே கட்டிக் காட்டி
மலைக்க வைத்த புனித மண் தஞ்சை

இப்படி எப்படிக் கட்ட முடிந்ததென
அசர வைத்த அரசனின் தஞ்சை
 
அகில உலகையும் அன்னாந்துப் பார்க்க
வைத்து உயர்ந்த மண் தஞ்சை

அரசியலில் கேட்டை விரட்டி கோட்டைக் கட்டி ஆளப்போகும் மண் தஞ்சை

மஹாராஜர் மாமன்னர் இராஜராஜர்
புகழைப் பரப்பப் போகும் மண் தஞ்சை!

- தஞ்சை த.இராமநாதன்

மோர் குழம்பு

 

மோர் குழம்பு

பிறந்தக் கன்றுக்குக் கொடுக்காது
கொதிக்க வைத்தால் கடும்புப் பால்

கன்றைக் கொஞ்சம் குடிக்க வைத்து கறந்ததைச் சேர்த்தால் குடும்பப் பால்

கறந்தப் பாலைக் கொதிக்க வைத்து சூட்டோடுக் குடித்தால் சூடானப் பால்

சூடானப் பாலைக் கெடாமல் தடுத்து
நொதிக்க வைத்தால் தயிரானப் பால்

தயிரில் வெண்ணெய்யை கடைந்துப் பிரித்தால் மோராக தயாரானப் பால்

மோரை அளவோடு கொதிக்க வைத்து தாளித்ததால் மோர் குழம்பானப் பால்!

- தஞ்சை த.இராமநாதன்