இலவயம் ஏலேல்
இலவசத்தை வாங்கும் நிலையில் உலகில் அதிக ஆட்களும் உண்டு
இலவசத்தைக் கொடுக்கும் நிலையில் உலகில் அதிக அரசுகளும் உண்டு
ஒருசாரார் வெவ்வேறு விதமாக வாழ்க்கைக்காக அள்ளிக் கொடுத்து வாழ வைக்கின்றார்கள்
மறுசாரார் வேறொரு விதமாக வாக்கிற்காக கிள்ளிக் கொடுத்து வீழ வைக்கின்றார்கள்
இலவசத்தை வாங்க ஏங்கி எதிர்பார்க்கும் நிலையில் இருந்தால் ஐயோ பாவம்
இலவசத்தை வாங்கி உரிமையை விற்கும் நிலையில் இருந்தால் ஐயையோ பாவம்!
- தஞ்சை த.இராமநாதன்
ஆன்றோர் வழி நடந்திடு
ஆன்றோர் என்பாரை ஆண்டோர் என்பாரும் உலகில் உண்டு
ஆன்றோர் என்பாரை ஆளப்போவோர் என்பாரும் உலகில் உண்டு
ஆறறிவைக் கொண்ட அனைவரும் அன்றும் ஆன்றோராக வாழ்ந்ததுமில்லை
பகுத்தறிவைப் பேசும் அனைவரும் இன்றும் ஆன்றோராக வாழ்வதுமில்லை
கற்றதைக் கசடறக் கற்றவரே அன்றும் இன்றும் என்றும் ஆன்றோர்
கற்ற கல்வியின்வழி மாசற்ற வாழ்வை வாழ்பவரே என்றென்றும் ஆன்றோர்
ஆன்றோர் நடந்த வழி எவ்வழியோ அவ்வழியே நடந்து நலம் பெறுவோம்!
- தஞ்சை த.இராமநாதன்
அன்னையரைப் போற்றுவோம்
தாங்க முடியாத மனவலியை
அம்மா என இதயத்தில் ஒலித்தால்
வலித்த வலியை ஓடவிடும் அன்னையரைப் போற்றுவோம்
தூங்க முடியாத உடல்வலியைத் தாயே என கதறிக் கண்ணீரில் நனைந்தால் கண்ணீரைத் துடைத்து அணைத்துக் காத்திடும் அன்னையரைப் போற்றுவோம்
உயிர் கொடுத்து உருவம் கொடுத்த அன்னையரைப் போற்றுவோம்
வளர்த்து எடுத்து வடிவம் கொடுத்த அன்னையரைப் போற்றுவோம்
பிறந்தது முதல் இறக்கும் வரை மறைந்தாலும் மறக்க முடியாத அம்மாவைத் தாயேயென அழைத்து நமது அன்னையரைப் போற்றுவோம்!
- தஞ்சை த.இராமநாதன்
குட்டிக் குட்டிக் கதைகள்
தலையாய குட்டிக் கதையைச் சொன்னாலும்
தலையில் குட்டிக் கதையைச் சொன்னாலும்
சொல்லும் ஆள் குட்டிச் சுவரான ஆளாக இருத்தலாகாது
குடித்தே வீட்டுக் குடும்பத்தை குட்டிச் சுவராக்கியோர் குடித்து நாசமாவார்கள் நடித்தே கூட்டுக் குடும்பத்தைக் குட்டிச் சுவராக்கியோர் நடித்து நாசமாவார்கள்
குட்டிப் போடும் பிராணிகளைக் கட்டிப் போட்டு வளர்ப்பது கறிக்காகவே
முட்டிப் போடும் மனிதர்களைக் கட்டிக் காத்து வளர்ப்பது காரியத்துக்காகவே!
- தஞ்சை த.இராமநாதன்
தில்லு முல்லு தள்ளி நில்லு
படாதபாடு பட்டாலும் பட்டபாட்டை படவிட்டு பட்டைப் போட்டு விடுவர்
விட்டு விட்டதை விடாது விட்டாலும் விடாததையும் வெட்டி விடுவர்
போட்டபடியே ஓட்டுப் போட்டதைப் போடாது போனாலும் போட்டு விடுவர்
கட்டியதைக் காட்டினால் கட்டாததைக் காட்டி கட்டியதாகக் காட்டி விடுவர்
பிடித்த வாதத்தைப் பிடிவாதமாக்கி பிடித்ததையும் பிடிக்காததாக்கி விடுவர்!
(ஓட்டு - Vote)
- தஞ்சை த.இராமநாதன்
ஆதி சிவனை வணங்க இன்றும் இங்கே வாங்க
அதே சிவனை வணங்க என்றும் இங்கே வாங்க
வேற்றுமையை மறந்து ஒற்றுமையோடு வாங்க
வெறுப்புணர்வை மறந்து விருப்புணர்வோடு வாங்க
பல ஆண்டுகளாக ஓர் ஓரமாக இருந்த லிங்கம்
சில ஆண்டுகளாக ஒய்யாரமாக இருக்கும் லிங்கம்
ஆதி சிவனென என்னால் பெயரிடப்பட்ட சிவலிங்கம்
ஆதியே சிவன்தானென எந்நாளும் பெயரெடுக்க போகும் ஆதி சிவனெனும் சிவலிங்கம்!
- தஞ்சை த.இராமநாதன்
(சோமன்தெரு, காசாங்குளம்-குலத்தார்)
15 Feb 2026, Singapore
புகலிடம்
எதிர்பார்ப்பும் இல்லாமல் எதிர்ப்பும் இல்லாமல் இருப்பதையெல்லாம் கொடுத்தால் கொடுத்தவரிடம் தேடி வந்து புகலிடம் தேடும் இல்லாமை
சூடும் இல்லாமல் சுரணையும் இல்லாமல் கிடைத்ததையெல்லாம் சுருட்டிக் கொண்டவனிடம் ஓடி வந்து ஒட்டிப் புகலிடம் தேடும் பொல்லாமை
கொடுத்ததால் கெட்டதாக எண்ணாத கொடுத்தவரிடம் புகழெல்லாம் கூடி வந்து சேர்ந்திடும் புகலிடம்
எடுத்ததால் வாழ்வதாக எண்ணும் எடுத்தவனிடம் இழிவெல்லாம் தேடி வந்து சேர்ந்திடும் புகலிடம்!
- தஞ்சை த.இராமநாதன்
காட்டிலும்...காட்டிலும்
அறிவு ஆற்றலைக் காட்டிலும் அழகைப் பெருக்கவே அதிகம் விரும்புகிறார்கள்
ஆக்கலைக் காட்டிலும் அழித்தலைக் கூட்டவே அதிகம் விரும்புகிறார்கள்
அந்தக் காட்டிலோ இந்தக் காட்டிலோ எந்தக் காட்டில் மழை பொழிந்தாலும் காடே நிலத்தோடு தாளம் போடும்
எந்த நாட்டில் எவராக இருந்தாலும் அந்த நாட்டில் பணம் பலமாக இருந்தால் அவர் காட்டிலும் மழை சக்கைப்போடு போடும்
வீட்டைக் காட்டிலும் நாட்டைக் காட்டிலும் காட்டில்தான் தியானத்தில் ஆழ்ந்தார் அக்கால முனிவர்
உண்மையான உறவைக் காட்டிலும் போலியான உறவை நாட்டிலும் கண்டு துரோகத்தினால் வீழ்ந்தார் இக்கால மனிதர்!
- தஞ்சை த.இராமநாதன்
உரித்தெடுத்த உறி
பனையில் உரித்த கயிரைப்
பானையில் நுரைத்த தயிரைப்
பூனையிடம் சிக்காது தவிர்த்துப் பானையினுள் பாதுகாத்ததுதான் உறி!
- தஞ்சை த.இராமநாதன்
தமிழைப் பழித்தால் பாவம்
தமிழைக் கசடற கற்றுக்கொண்டாரின் கையிலும் நாவிலும் குதித்துக் கூத்தாட தவமாய் தவமிருக்கும் நிலையிலேயே உள்ளன வேற்று மொழிகள்
தமிழைப் படித்தால் பிச்சைகூட எடுக்க முடியாதென்று எவர் சொன்னாலும் எவரோ சொன்னதாகச் சொன்னாலும் சொன்னவர் அவனோ அவளோ அவர்கள் பாவப்பட்ட பரிதாப பரதேசிகள்
வந்தாரை எல்லாம் வாழ வைத்த தலைமைத் தமிழின் தாய் மண்ணான தமிழ்நாடே
வரப்போவோரையும் வாழ வைக்க காத்திருக்கும் தாய்த் தமிழ் திருநாடே
கொடுக்கப் பழக்கப்படுத்தி அள்ளிக் கொடுக்க வைத்த என் இன தமிழ்த் தாயே!
பழித்தால் பதிலை தக்க நேரத்தில் திருப்பிக் கொடுத்திடச் சொல்லிக் கொடுத்திட்ட தன்மானத் தமிழ்த் தாயே!
- தஞ்சை த.இராமநாதன்
சிரமேல்குடி ஸ்ரீ ராமர்
பொய்யை மெய்யாக்கி மெய்யைப் பொய்யாக்கிடும் மனிதர்களைக் கூட்டி நல்வழியைக் காட்டிடுவார் ஸ்ரீராமர்
பழமையை மறந்து புதுமையைப் புகழ்ந்து பணபோதையில் ஆட்டம் போடும் லௌகீக குண பித்தர்களை அர்த்தமுள்ள ஆன்மீக பக்தர்களாக மாற்றிடுவார் ஸ்ரீராமர்
சிரமப்பட்டோ சிரமப்படாமலோ மேல் குடி என எண்ணுவோரை சிரத்தின் மேல் குடி கொண்டு நல்குடிகளாக மாற்றித் தேற்றி நல்வழிப்படுத்துவார் நமது ஸ்ரீராமர்
பல்லாண்டுகளுக்கு முன்பாக M.P.R எனும் ராமர் பெயர் கொண்ட நல்லாரும் S.D.R எனும் ராமர் பெயர் கொண்ட நானும் வணங்கிய அந்நாளை இந்நாளில் நினைத்து உள்ளத்தின் ஒலியை ஒளியாக்கி வணங்குகிறேன் ஸ்ரீராமரே!
- தஞ்சை த.இராமநாதன்
பற்றில்லாப் பற்று
பற்றின்றிப் பற்றைப் பற்றிப் பற்றையும் பற்றின்றிப் பற்றலே பற்று
- தஞ்சை த.இராமநாதன்
