காண்பதே காணும் பொங்கல்

 

காண்பதே காணும் பொங்கல் 

முறைப் பெண் முறைத்துப் பார்த்தாலும் முறைப்படி பார்க்கிறேன் முறைக்காதே என ஜாடையில் சொல்லி பவ்வியமாய்ப் பம்மும் பையனுக்கும் காணும் பொங்கல் 

முரட்டுப் பார்வையுடன் முறைப் பையன் பார்த்தாலும் அடக்கிவிடுவேன் உன்னை என அடக்கத்துடன் பார்க்கும் அழகுப் பெண்ணுக்கும் காணும் பொங்கல்

தாலி கட்டியக் கணவனைத் திட்டித் தீர்த்தாலும் வேட்டிக் கட்டிய வீரனெனப் புகழ்ந்து பொங்கலைப் பரிமாறும் மனையாளுக்கும் காணும் பொங்கல்

குடும்பத்தைக் கட்டிக் காக்கும் மனைவி        தன் உயிரைக் காக்கும் துணைவி என போற்றிப் புகழாவிட்டாலும் அப்படி நினைக்கும் கணவனுக்கும் காணும் பொங்கல் 

இளையோர்க்கு ஆசீர்வாதம் வழங்கும் பெரியோர்க்கும் காணும் பொங்கல்      வயதில் மூத்தோரைக் கண்டு வணங்கும் இளையோர்க்கும் காணும் பொங்கல்

பொங்கலை இனிதாக முடித்து வைத்து சிறப்படைவது காணும் பொங்கல்                  காண முடியாததைக் கண்டு கொள்ள                வழி வகுப்பதும் காணும் பொங்கல்!

- தஞ்சை த இராமநாதன்