எனது சின்ன அத்தை

எனது சின்ன அத்தை

சிறுவனாக ஓடி ஆடி உற்சாகத்துடன்      அதிகம் விளையாடியது என் வீட்டருகே
அதையடுத்து அதிகம் விளையாடியது        என் சின்ன அத்தை வீட்டின் அருகே

அதிகாலையில் மீசை மிடுக்குடன்                மாமா சுடுவார் சூடான தோசை
இவ்வேளையில் அப்படியொரு தோசை   கிடைத்துண்ண மேலான ஆசை

சீறிப்போன வெடி மருந்தைக் கொட்டி தீக்குச்சியை வைத்துப் பற்ற வைத்தேன்
சீறிப் பாய்ந்த ஒளிச்சூடு வலது கை விரல்களைச் சுட துடித்துக் கரைந்தேன்
சின்ன அத்தை கத்திக் கதறியபோது நேசத்தைக் கண்ணீரோடுக் கண்டேன்

பனை மரங்கள் நிறையக் கண்டது அங்கு
நான் மனம் நிறைய உண்டது நுங்கு
ஏரை ஓட்ட கத்துக் கொடுத்ததும் மாமா
செக்குமாடு பார்த்ததும் அங்கேதான் ஆமா

ஏம்பா ஏன்யா என அழைப்பார் அத்தை
அசைபோடுகிறேன் அத்தை பாசத்தை
தர்மராசா ராமதாசா என்பார் பண்போடு மஹாராசா ராஜராசா என்பார் அன்போடு

பாசத்திற்குக் குறைவில்லாத அத்தை
ரோசத்திற்கும் குறைவில்லாத அத்தை
அவர்தான் என் சின்ன அத்தை ஆயியம்மாள் முருகையன்!

தம்பதியர் வாழ்க பல்லாண்டு!!

- தஞ்சை த.இராமநாதன்