கூட்டம்

கூட்டம்

சுய புத்தியோடு கூடினால் அது கூட்டம்
பய விரக்தியோடு கூடினால் அது கூட்டமா?

கூடுபவர்களோடு சேர்ந்து கூடினால் அது கூட்டம்
கூட்டியவர்களோடு சேர்ந்து கூவினால் அது கூட்டமா?

நீதிக்காகக் காட்டமாகக் கூடினால் அது கூட்டம்
நிதிக்காகக் கட்டாயமாகக் கூடினால் அது கூட்டமா?

கூட்டத்தோடு கூட்டமாகக் கூடினால் அது கூட்டம்
கூட்டத்தைக் கூட்டவேக் கூடினால் அது கூட்டமா?

உரிமையோடு உணர்வுக்காகக் கூடினால் அது கூட்டம்
பெருமையோடு உணவுக்காகக் கூடினால் அது கூட்டமா?

நிற்பதற்குக் கூட இடமில்லாமல் கூடினால் அது கூட்டம்
நிற்பதற்காகவே கூட்டம் கூட்டினால்
அது கூட்டமா?

பட்டி தொட்டியெல்லாம் நடந்து கூடினால் அது கூட்டம்
பாட்டுப் பேட்டியெல்லாம் நடத்தக் கூடினால் அது கூட்டமா?

கூடிய கூட்டத்தைப் பற்றிப் பேசப்பட்டால் அது கூட்டம்
கூடியவரே கூடியதைப் பற்றிப் பேசினால் அது கூட்டமா?

- தஞ்சை த.இராமநாதன்